WUNPAWNG AMYU HTE RAWT MALAN MAJAN

Ka ai – Marip H. Naw Awn

Wunpawng Labau Ginshi

British Asuya gaw 1885 ning htum wa daw kaw nna Wunpawng Mungdan hpe gabye shang wa sai lam anhte mu chye saga ai. Britisha ni tawt lai du gabye ai buga shara shagu hkan e shanu nga ai amyu sha n lang shanhte hpe laja lana hkap gasat hkrum masai.

Dai hta Wunpawng sha ni mung, Mung maden Britisha Asuya hpe shanhte hta rawng ai n-gun atsam mahkra hte shaninglaw law ninghkap majan galaw lai wa masai. Maigan hpyen hpe tawk sek n ju ai myit hte Wunpawng mung shawa ni gaw lu mai ai masha n-gun, laknak n-gun gahkyin nhtawm asak du baw law law sum hkam let aten galu gasat manga lai wa masai.

Dai majaw Britisha Asuya gaw bai pru mat wa ai ten du hkra Wunpawng ginra nkau mi hpe n lu zing madu la ma ai. Dai zawn Wunpawng sha ni a mungkan hta laklai magrau grang ai lam ni hpe mu chye lu ai majaw Britisha Asuya gaw Wunpawng sha ni hpe shanhte a hpyen dap ni hta hpyen magam shang gun na matu hpyen lahkawn masai. Shingrai nna Masat I hte Masat II Mungkan Majan ten hta Britisha hpyen dap ni kaw Wunpawng hpyen du hpyen la ni law law magam shang gun lai wa masai. Wunpawng hpyen du hpyen la ni hta na majan hta magrau grang ai majaw Britisha Asuya kaw nna shagrau dazik jaw hkrum ai hte England Hkawhkam King George V a laksan shagrau kumhpa lu ai pyi law law nga sai lam anhte chye chyalu rai nga saga ai.

Britisha Asuya gaw shanhte a hpyen dap ni hta hpyen magam shang gun ai Wunpawng sha ni a ntsa hkap maram yu yang Wunpawng sha ni gaw shanhte a hpaji machye machyang madang hte n bung n pre hkra chye na hkap la loi ai amyu ni re ai hpe mu chye lu ma ai. Ndai lam hpe hpyen magam gun ni a ntsa e sha n rai, mung mare masha du gyi salang ni a ntsa e mung shanhte maram chye lu ma ai.

Shangrai nna Wunpawng Amyu ni gaw prat dep hpaji ningli ni hpe lama chye la lu yang shanhte hpe ram ram dingbai dingna jaw lu na amyu ni re ai ngu Britisha Asuya sawn lu nga sai. Dai majaw Britisha Asuya gaw shaning 50 ning Wunpawng Mungdan hpe up sha lai wa sai raitimung prat dep laika hpaji jawng ni hpe dam lada, madang tsaw ai hku n hpaw shagreng ya nga ai. Wunpawng sha ni hpe shanhte sharin ya ai laika hpaji ngu na gaw chyum laika chye hti na madang, shagun laika chye ka na madang sha rai nga malu ai. Lam mi hku tsun yang shanhte Britisha Asuya ni a Colony mayam up hkang rung hkan jai lang mai na daram sha Wunpawng sha ni hpe hpaji sharin ya lai wa masai.

Mungkan hta Colony mung maden asuya ni a htung tara lailen hte maren Britisha Asuya gaw Wunpawng sha ni hpe mungmasa prat dep, madang mu dep hkap hkra laika hpaji n sharin ya ai gaw, labau hta makoi magap kau n lu ai lam langai mi rai nga ai. Dai zawn Britisha Asuya a myit magaw ai lam ni a majaw Britisha Colony prat hta Wunpawng sha ni mungmasa prat madang ram ram hpang hkrat lai wa sai. Mung masa nam chyim nam ta ngu ai hpe Wunpawng sha nlang hte lamyin chyang daram pyi n hkam sha lu lai wa masai. Raitim, amyu sha langai mi gaw amyu sha langai mi hpe prat tup jaw lup dip manat sha tawn lu ai labau ya du hkra mungkan hta garai n nga nga ai.

Dai teng man tara hte maren Wunpawng uhpawng hta mung, Maigan Colony asuya wa kade daram dip tawn ai raitimung, mungmasa hta myihpaw, na na ai masha lani hte lani paw pru wa nga sai. Dai zawn Wunpawng sha ni hta mungmasa madang rawt jat wa ai hte maren maigan mungmaden Britisha wa a dip gamyet sha tawn ai kata e Wunpawng sha ni mungmasa lam, sut masa lam hte shinggyim nga sat nga sa lam ni hta kade daram dum hprut machyi nga ai ngu ai hpe hkau na pa kaw magwi hkawm dan ai zawn adan apra mu mada wa masai. Dai majaw Wunpawng sha ni prat dep galu gaba wa na matu gaw tawt lai mungmaden Britisha Asuya hpe Wunpawng Mungdan kaw na lawan gawt shapraw kau ra sai lam hpe hpaji madang nga ai Wunpawng salang ni asan sha hprang wa shajang masai.

Shingrai chye wa ai hte maren Britisha prat htum wa daram hta Wunpawng sha ni a lapran e mungmasa myitsu myit rawt ai lam hte mungmasa shamu shamawt ai lam tsawm ra nga wa sai. Raitimung, teng man ai hpe gwi gwi tsun ga nga jang dai ten hta mungmasa loi li myi hpaw ai masha Wunpawng uhpawng hta hti dang sha naw rai nga ai. Shanhte a mungmasa machye machyang mung prat madang garai ndep lu nga ai. Dai majaw shanglawt lu ntawn hta Myen Mung hte pawng nna shanglawt la na hku shanhte jawm dawdan lai wa masai. Dai ten hta hpa-awn tai nga ai Wunpawng salang ni a myit hta Britisha Asuya a lata kaw nna lawt lu jang rai sai ngu ai sha katu nga malu ai. Htawm hpang prat a matu sumtsan sat nna shanhte n mu mada nga ma ai. Shanglawt hpe Myen hte pawng nna n la na hku prat dep mungmasa myi hpaw nga sai Britisha Asuya kade hpaji jaw timung Wunpawng salang ni n hkap la masai. Shaingrai nna Britisha Asuya gaw Wunpawng Mungdan hpe Myen Mungdan hte pawng gumhpawn let, 1948 ning January praw 4 ya shani shanglawt jaw dat sai.

Wunpawng Salang ni mung, Munghpawm Myen Mungdan kata shang lawm na lam 1947 February shata 12 ya shani Pang Lung Myit Hkrum Laika pa kaw ta masat jawm htu ngut masai. Bai, 1948 ning January shata praw 10 ya shani Wunpawng Mungdan hpe Munghpawm Myen Mungdaw ( Kachin State) ngu masat dat sai lam anhte chye lu nga saga ai. Shanglawt lu ai hpang Munghpawm Myen Mung Asuya gaw Pang Lung Ga Sadi ni hpe shingdu tawn kau nhtawm Myen mungmasa salang ni madu ai HP.S.P.L. pati myit ra ai hku mungdan hpe up sha wa masai.

Myen amyu ni gaw amyu kaba lailen lang nna bum nga masha amyu kaji ni hpe lam amyu myu hku dip rip sha ai lam lani hte lani grau grau dan dawng wa sai. Dai zawn re ai kumla ni gaw hpyen dap ni hte asuya magam dap ni hta law malawng dan dawng nga ai. Dai majaw n kam hkam ai Wunpawng hpyen du hpyen la nkau mi gaw 1949 ning hta n shawp n kap ai HP.S.P.L. asuya hpe laknak lang rawt malan ai lam galaw lai wa sai.

P.N.D.F. (PAWNG YAWNG NATIONAL DEFENCE FORCE)

P.N.D.F. gaw Britisha Asuya Myen Mung hpe shanglawt jaw ai hpang Wunpawng sha ni a shawng nnan na laknak lang rawt malan ai hpung rai nga ai. Dai hpung hpe 1949 November shata 15 ya shani Du Kaba Naw Seng woi hpaw sa wa nu ai. Du Kaba Naw Seng gaw Masat II Mungkan Majan ten hta Wunpawng Lavies dap kaw B.G.M. dazik hpe shagrau hkrum hkra magrau grang dan hkung lai wa ai hpyen du langai mi rai nga ai. Myen Mung shanglawt lu ai hpang Masat I Jinghpaw Dap (1 st. Kachin) de bai magam htawt gun nu ai. Masat 1 Jinghpaw Dap kaw magam gun ai ten hta HP.S.P.L. asuya a n-shawp n kap ai lam, Myen Mung asuya du ni a myit magaw ai lam ni hpe shi n kam hkam, yu matsat ai majaw shi a Masat 1 Jinghpaw Dap hpe npawt nhpang n gun shatai n htawm woi rawt malan wa sai. Shi a rawt malan hpung (P.N.D.F.) hpe Du Kaba Naw Seng gaw lawu de na hte maren awng dang ai hte hpaw shabawn tawn sai.

  1. General Naw Seng.
  2. Brigadier Hprang Gam Di (1st. Bde. Comdr.)
  3. Brigadier Hkam Man (2nd. Bde. Comdr.)
  4. Major Zau Seng (1st. Bde. B.M.)
  5. Major Ndau Krang (2st. Bde. B.M.)
  6. Hta Na Uk Maran Zau Bawk (Balik Dap Comdr.)
  7. I.P. Shanghtin Yaw (Kai Chyan Dap)
  8. Bang Gai Du Zau La (Gumhpraw Dum)
  9. Salang Waje Naw (Up Hkang Dap Lit Hkam)
  10. Salang Hpau Na La Gawng (Up Hkang Dap Lit Hkam)

Du Kaba Naw Seng gaw P.N.D.F. hpaw sai hte shang wa ai Wunpawng ramma ni hpe hpyen hpaji (Training) hkap sharin ya nhtawm hpung hpe dam lada ai hku hpaw shagreng wa nu ai. Dai ten asuya magam gun salang nkau mi hta lai nna Wunpawng mungshawa law malawng gaw P.N.D.F. hpe ram ram madi shadaw lai wa sai.

Du Kaba Naw Seng gaw P.N.D.F. hpung hpe Wunpawng ni shanu nga ai lahta Sam Mungdaw ( Kachin Sub-State) kata Kutkai Ginwang e hpaw hpang ai rai nga ai. P.N.D.F. hpung gaw nnan hpaw hpang dat ai hte rau HP.S.P.L. asuya amu gun shabrai sha nga ai Wunpawng hpa-awn ni a ja ja ninghkap gasat ai hpe hkrum katut lai wa sai. Dai majaw P.N.D.F. asak naw hkrung nga ai ten hta Wunpawng hpyen la shada gasat hkat nna du daw sai hkaw lam ram ram law lai wa sai.

Wunpawng sha ni a lapran HP.S.P.L.asuya a sai garan ai majan hpe mung, P.N.D.F ram ram hkam sha lai wa sai. Ndai hte seng nna dan dawng ai kumla langai mi hpe anhte lawu de na hte maren mu lu nga ga ai. Dai gaw Jinghpaw Mungdaw kaw nna shabra ai ndai laika langai mi rai nga ai.

?HPU NAU MUNG MYIT SINLI LA NI E, NAW SENG HPANG HKAN GWI RAN NI E, ASUYA KAW NNA JUM N DUT SHALAI JAW YANG HPA SHA NA MATA. DAP SHA MI N BANG MYIT YANG GAW, LAIKA NDAI LU LA AI HTE MAREN TINANG A DUM NTA DE WA MAT MU, NDAI LAIKA HPE MYITKYINA, MANMAW SALANG NI, NHKA MUN TSIP TSIP RE AI MYITSU SALANG NI, MYIT YU, MANG YU NNA NDAU SHABRA DAT AI RE. LAIKA NDAI KA LAJANG DAT AI GAW U-GYI HTING NAN RE

Lahta na ndai laika pa lu hti ai hte Du Kaba Naw Seng a myit hta ram ram hkra mat nu ai. Mungmasa prat hpang hkrat ai Wunpawng salang ni hpe Du Kaba Naw Seng ram ram yawn mat u ai. Raitimung, shi gaw myit n daw ai sha P.N.D.F. hpe matut nna woi shamu shamawt mat wa nu ai. Shingrai nna shi gaw Wunpawng Mungdan hpe Mungpawm Myen Mung kaw na bai gasat di la na matu P.N.D.F. hpung hpe Wunpawng Mungdaw de woi lung wa sai. Shaloi HP.S.P.L. asuya gaw Wunpawng Mungdaw kata e P.N.D.F. ru jung lu na hpe tsang ai majaw Jinghpaw Mungdaw na Wunpawng salang nkau mi hpe dat nhtawm Du Kaba Naw Seng hpe asawng woi la shangun mu ai.

Shingrai nna Wunpawng salang ni gaw HP.S.P.L. asuya matsun lit jaw ai hte maren Du Kaba Naw Seng hte Nam Hkam mare kaw e bawngban zuphpawng galaw ma ai. Dai zuphpawng hta Wunpawng salang ni gaw Du Kaba Naw Seng hpe asuya bungli bai shang gunhpai na lam, HP.S.P.L. asuya kaw nna shi hpe arawng aya kaba jaw na lam, Wunpawng uhpawng kata e laknak lang rawt malan hpung hpaw yang Wunpawng myu sha ni jam jau jamhkau du daw sai hkaw law na re ai majaw P.N.D.F. hpung hpe Wunpawng ginra kata de n kam jashawn la ai lam ni tsun bawngban mu ai. Shaloi Du Kaba Naw Seng gaw shi gara hku mung asuya bungli bai n lu shang gun sai lam, Myen gaw sadi n dung ai lam, Myen hte sha a ganawn nga yang galoi mung Wunpawng amyu sha ni pyaw lu na n re ai lam, dai majaw, anhte yawng gahkyin gumdin nna Wunpawng Mungdan shanglawt hkra bai gasat di la ra sai lam ni nhtang tsun bawngban u ai.

Dai zuphpawng hta myit hkrum lam n lu la ai majaw P.N.D.F. hte asuya dap ni laja lana bai gasat hkat wa masai. Dai zawn Wunpawng amyu ni a matu shakut ai lam hta Wunpawng shada sha bai sat hkat ra ai majaw Du Kaba Naw Seng gaw ram ram myit n pyaw byin nga sai. Mungmasa myi n hpaw ai Wunpawng salang manang ni a ntsa e mung shi ram ram myit machyi mat nu ai. Dai majaw shi gaw lahta Sam Mungdaw Mungbaw mare makau shara langai mi kaw shi a hpyen hpung ni hte zuphpawng woi galaw u ai. Dai zuphpawng hta Du Kaba Naw Seng tsun sha ga ai mungga gaw Ya dai ni Myen hpe gasat ga she ngu yang anhte amyu shada hkrai she gasat gala, du daw sai hkaw na malai, shanhte myi n hpaw hprang raitim, anhte myitsu ra sai. Dai majaw anhte mahtang Miwa Mung de hprawng yen mat saga. Jinghpaw amyu ni hkrap ngu hkrap ngoi ai shani she bai wa hkye la ga . Nanhte mung tinang a dum nta de wa mayu ai ni wa mu, ngai kaw hkan mayu ai ni hkan mu. Nga ai rai nga lu ai.

Dai zuphpawng ngut ai hte 1950 ning hta Du Kaba Naw Seng gaw marai 300 hte Miwa Mung de hprawng shang mat wa sai. Dai zawn Wunpawng sha ni mungmasa madang grit nem ai jaw e Wunpawng sha ni a manu dan ai ginjang langai mi tat sum kau nga sai. Wunpawng sha ni a shawng nnan na laknak lang rawt malan majan gaw lahkawng ning tup sha asak hkrung shamu shamawt lu nna hkring mat ra sai rai.

 

Leave a Reply

Your email address will not be published. Required fields are marked *