Wunpawng Amyu Sha ni a Amyu Sha Mung Masa Labau Kadun (Daw 3)

DAW 3 NO.2 MUNGKAN MAJAN HTE HPETSIT ( FASCIST ) JAPAN SHANG SHANEN AI PRAT. ( 19421- 45 ).

1939 ning September shata e Germany Asuya, Poland mung hpe htim gasat hpang dat ai shani kaw nna, N0. 2 Mungkan majan byin hpang wa sai. Ninghtoi : 7-12 ? 1941 ya shani Japan Hpyen nbungli ni Amirican ni a Hawali zunlawng na Pale Daru ( Pearl Harbor) hpe bawm jahkrat gasat dat ai kaw nna Pacific Nam- Muk dara de majan baw wa sai. Shing rai No.2 mungkan majan byin wa sai. Germany, Italy hte Japan Asuya ni Axis ngu ai myit hkrum Hpyen man hpaw nna, mungkan ting hpe gasat ga- up na maw mawn nga ma ai.

Majan masing kaba hku nna, Asha dan a dingda hte Sinpraw Dingda mungdan ni hpe magra shanyen da nga ai British mung maden hpyen hpe gasat shamyit kau na shing te lawk madung rai nga ai. (Madung gaw, hpaga gat lawk ginra hte Colony lamu ga gashun hkat ai lachyum sha rai nga malu ai ).

Majan masing kaba hte maren, Asia Sinpraw Dingda lamu ga ni hpe shawng magra gamyet tawn nna, n-gun kaba ai British Colony Kala ( India ) Mungdan hpe gasat shanyen la na yaw shada ai hpe chye lu ai. Dai majaw, Philippine, Singapore, Malaysia hte Myen Mung ni hpe shawng gasat dang la na matu, Myen Mung hte Wunpawng Mungdan de Japan ni shang na yaw shada nga ai ten hta British Colony Asuya hpe mala shapraw kau mayu ai Awng San wa woi awn ai Myen Amyu Sha n kau mi hte Japan hpyen hpa-awn ni hkrum ginrat la lu ai hte rau, 1942 ning hta Japan Hpetsit Hpyen Hpung Kaba Myen Mung hte Wunpawng Mungdan de shang bang wa sai. 1942 ning May shata praw 5 ya hta Japan ni Hkat Chio de du nna Myitkyina hpe 8-5-1942 ya shani dang la ai. Dai hpang Sum Pra Bum hte Putao lapran Sum Pyi Yang de du kabye sai.

Dai Japan ni gaw hpyen hpung (Army) dap nu kaba masum ting hpe gasat ngun madung shatai ai hpe chye lu ai. (1) 15 Army hte (2) 33 Army gaw India Kala mung hte Miwa Mung , Yu Nan Mungdaw de htim shang wa ai. Hpyen du kaba ni gaw (1) General Ya Ma Shi Ta (2) General Honda (3) General Renya Mutagushi hte, (4) General Hom-ma ni re hpe labau hta mu lu ai.

Hpetsit Gum Shem Japan hpyen ni Myen Mung masha ni hte Wunpawng masha ni hpe ram ram zing ri, yam sha lai wa sai hta n-ga, mara kata kaw sat kau hkrum ai hti ndang rai lai wa sai.

Wunpawng Mungdan kata shang kabye ai Japan hpyen ni 1942 ning kaw nna 1945 ning laman sha nga lu ai. 1943 ning kaw nna British Asuya gaw American Asuya hte myit hkrum hpyen man (Alliance) hpaw nna Japan hpe bai nhtang htim gasat ai. 1944 hte 1945 ning hta majan sawng dik rai nga ai.

British hte American myit hkrum hpyen hpung kaba hpe up ai Du Daju gaw, Mountbettan rai nna, General William Slim, General Alexander, General Stil Will, General Wingate, General William Peers hte General Donovan ni woi awn lai wa masai.

British Asuya Dap ni gaw, No.1 Mungkan majan na Wunpawng hpyen la ni a kang ka, Sadi dung, Magrau grang ai atsam hpe atsawm sha mu chye ai hta n ga, lamu ga ginra hte nam mali dang ai Wunpawng Amyu hpe n-gun galung la yang, Japan hpe gasat ai hta tang du na re hpe chye nna, mi na British Dap Wunpawng Hpyen Du Hpyen la ni hte mare buga na Wunpawng ram ma wa ngan ni hpe gahkyin gum din nna BritishKachin Levies Dap ngu hpaw ai . American Dap ni mung, Wunpawng ram ma, Wa ngan ni hpe kahkyin gum din la nna American Ranger Dap ngu hpaw ai. Ndai British Kachin Levies hte American Kachin Ranger Wunpawng hpyen hpung ni gaw, dai Alliance Dap ni hte rau Japan hpyen hpe Wunpawng Mungdan kata kaw nna gasat gawt shapraw kau lu sai.

Myitkyina Mare hpe ninghtoi ; 78 ya tup gasat nna 3-8-1944 ya shani Japan a lata na bai lu la sai. Dai majaw , 1944 ning October shata Myitkyina, Num Koi yang kaw padang manau dum sai. 9-9-1944 ya shani kaw nna Myitkyina mare hpe Alliance Force Dap ni atsawm sha Dap jung magra jum da lu sai.
Japan hpyen ni hpe Wunpawng mung ga kaw nna 1945 ning March shata hta atsai sha gasat dang kau sai majaw, 1945 ning, March shata 24 ya kaw nna 26 ya laman Sin Lum Bum e padang manau dum sai. Ndai manau hta American hte ta gindun nna majan gasat ai American Kachin Ranger Wunpawng Dap ni shang lawm ai padang manau poi rai sai.

Shing rai, grai magrau grang nna myi di chyip gasat lai wa ai Wunpawng share ninghkring ni law law wa hpyen htung tara hku masat shagrau ai, share ninghkring kumhpa( Medals ) ni hpe lu la shajang sai hpe labau hta mu lu sai rai.

Japan gasat ai hta Ranger Dap hku nna shang gasat lawm ai Wunpawng marai (238) tinang a mungdan a matu asak ap nawng lai wa sai. Shanhte shagrawt kau ai Japan hpyen la (5400) hpe hti matsing lu ai, n-matsing lu ai hte Levies Dap hku nna gasat ai hte yawng pawng yang Japan hpyen la (20,000) jan shagrawt kau lu ai hpe chye lu ai. Levy Dap hta shang lawm nna, Mungdan a matu, asak ap nawng sai Wunpawng sha ni hte Ranger hku gasat nna asak ap nawng lai wa sai yawng pawng yang ram ram law mat sai.

British hte pawng nna Japan hpyen hpe gasat shachyut kau ai ngu ai hta, British mung maden wa mung maigan wa sha re, Japan hpyen ni mung maigan wa sha re. Gara wa shang shanyen dip up sha ai hpe mung ra sharawng ai nre. Rai yang, Japan mung maden hpyen hpung ni gaw Hpetsit gum shem lai len lang nna, grau dip rip zing ri, sat nat re ai majaw, shanhte hpe grau nri nna, shawng gasat shachyut kau ai lam rai nga ai.

Gara maigan wa je hpre shang wa tim, kadai hpe mung hkyam sa njaw ai sha, lu ai lak nak hta lang nna, nang si ngai hkrung hku magrau grang let hkap ninghkap gasat ai hpe yu nna, anhte a jiwa ni tinang a shadip jahpang lamu ga, mungdan hte tinang a amyu hpe kade sha tsaw ra nga ai hpe anhte asan sha mu lu sai re. Dai prat hta mungkan jawt nna mung masa nchye galaw tim, myu tsaw, mung tsaw myit hte shinggan de nna je hpre shang wa ai mai gan hpyen wa hpe ning hkap gasat nna, tinang a dai lup dai hpang kanu mungdan hpe, myi di chyip tsaw ra makawp maga lai wa sai jiwa ni a labau hpe chyawm gaw nmai malap kau na ga ai law.

Wunpawng Amyu Sha ni a Amyu Sha Mung Masa Labau Kadun, Ginjaw Komiti, Wunpawng Mungdan Shanlawt Hpung.

 

Leave a Reply

Your email address will not be published. Required fields are marked *