Wunpawng Amyu Sha ni a Amyu Sha Mung Masa Labau Kadun (Daw 4)

DAW – 4 BRITISH MUNG MADEN WA A LATA NA SHANGLAWT HPYI, SHANGLAWT LU AI LAM.

 

1945 ning August shata (15) ya shani Japan ni laknak jahkrat ai hpang, British ni gaw, Kala mung, Simla Mare e shanhte ka jahkrat la ai MAI SAU HPRAW MASING ngu ai SIMLA MASING (Shayan No. 7 du ai) hpe ka shajin gun nna, myen mung hte Wunpawng mung de bai shang wa nna mi na shi a tingnyang hta bai sa dung ai. Dai majaw, maigan wa a uphkang ai npu na shanglawt lu mayu ai myen amyu sha mung masa hpung ni gaw, masing amyu myu, ladat amyu myu hku shamu shamawt kabrawng wa sai.

Shing rai shamu shamawt wa ai mung masa uhpung ni kaw na, n-gun ja nna dan dawng dik ai gaw, AFPFL ngu ai (HP.S.P.L) hpung rai nna, woi awn ningbaw ai gaw, U Awng San ( General – Awng San ) rai nga ai. Kaga Salang law law kaw na langai lahkawng a mying tsun ga nga yang, U NU, U THAN HTUN, U TIN HTUT, TAHKIN SOE, U SAW, TAHKIN MYA, U BA SWE, U KYAW NYEIN ni rai nga ai.

Mung Masa U hpung shagu pawng hpawm ai re majaw, Mung Masa Salang law law wa rai nga ma ai.1945 – ning, December shata hta U Awng San gaw, Captain Htun Hla ngu ai wa hpe Sama Du Wa Sin Wa Nawng hpang de shangun dat nna, Myen ni hte Wunpawng ni British a lata na shanglawt rau la na lam wa tsun shangun ai. British mung maden hpe ninghkap na matu, ningja jat bang ya u ai.

1946 – January 14-16 hta Myitkyina kaw padang manau dum ai. Dai manau hta 15 ya shani Wunpawng Mung shawa 5000 – jan lawm ai Zuphpawng woi hpawng ai. Man-Maw na Du Wa Lahpai Zau Lawn hpawng Tingnyang Up Lit la ai. Dai shani lawm ai Mung Masa Salang ni gaw (1) Du Wa Zau Lawn, (2) Du Wa Wa Baw Zau Rip, (3) Salang Kareng La, (4) Du Wa Dingra Tang, (5) Salang Hkaw Sau, (6) Chying Htawng Du Wa Zau Naw, (7) Machyang Baw Du Wa Sumdu Gam, (8) Salang Hpung Zi Hpung,(9) Lawdan Du Wa Zau La, (10) Salang Maran La, (11) Salang Dagam Sum La, (12) Hawwa Du Wa Hkun Hpung, (13) Salang U Gyi Hting Nan hte (14) Salang Maraw Tu ni re hpe labau hta mu lu ai.

Ndai Zuphpawng gaw Wunpawng Amyu sha ni a labau hta shawng na lang Mung Masa zuphpawng rai sai ngu nna masat na lam rai nga mali ai. Ndai mung shawa Zuphpawng hta madung gaw, masha kaga amyu ni e dip up ai kata na asan shalawt ra ai ngu ai lam rai nga ai.
1946 – ning November 28 ya shani U Awng San Myitkyina de du lung wa nna, 29 ya shani Wunpawng myit Su, Du Salang ni hte hkrum hpawng ai. Dai shani, (1) Sama Du Wa Sin Wa Nawng, (2) Salang Kumreng Gam (3) Captain – Nhtung Hka Gam, (4) Captain – Lasham Naw, (5) Captain Lazing La Mai hte lahta e tsun lai wa sai Salang (14) mung dung lawm rai, yawng Salang (19 ) tup hpawng hta lawm ai.

Dai shani U Awng San hkaw tsun ai lam ni gaw lawu na hte maren re hpe chye lu ai.

  1. Myen Mung British lata na shanglawt lu na sha rai sai lam.
    2. Kachin (Wunpawng Amyu) ni hpe ginhka uphkang tawn ai majaw, shaning 60-ning jan wa tim,Kachin ni ravvt jat lam n-nga ai.
    3. Myen Mung hte pawng nna shanglawt la dat jang Kachin ni Myen ni hte shing rau nna rawt galu kaba wa na re hte, Mung maden a maw lanyet shachyai nhkrum sana re lam.
    4. Mung maden wa Kachin ni hpe laksan shanglawt jaw na nga ai hpe kam shara n-nga ai lam.
    5. Myen hte shanglawt rau la ai mi rai tim, Myen Amyu ni Wunpawng (Kachin) ni a ntsa up ka-up sha na nre ai lam.
    6. Wunpawng (Kachin) Bum Ga ( Buga ) hpe Kachin ni ra sharawng ai hku Uphkang sha lu na sha re ai lam.
    7. Myen Mung hte rau shanglawt la jang gaw Kachin ni a matu laksan Hpyen Dap (3) hpaw ya na re ai lam.

Ndai lahta na mungga hpe dai shani zuphpawng sa lawm ai Du Salang ni a na hta madat htuk nna, kam hpa hkap la manu ai rai. Dai re majaw, 1947-ning February shata (6) ya kaw nna (12) ya laman hpawng ai Sam Mung PANG LUNG zuphpawng de Wunpawng Du Salang ni sa lawm na daw dan masai.

PANG LUNG ZUPHPAWNG A YAW SHADA AI GAW

  1. British mung maden garai nsa up ai shawng e, Myen Hkring mang ni uphkang ai myen mungdan lamu ga hte British e mung maden nna Colony uphkang gaiwang langai sha shatai tawn ai Wunpawng, Sam, Hkang (Chins) Kayah zawn re ai kaga amyu baw sang (Ethnic Groups) ni a mungdan buga yawng lawm ai hku nna British lata na shanglawt pawng la nhtawm Mung Hpawm Mungdan langai gaw gap na lam.
  2. Wunpawng Amyu ni a matu laksan Mungdaw langai masat la na lam ni rai nga ai. 1947-Feb (6) ya hkying-14:00ten PANG LUNG mare e Wunpawng hte Sam Komiti zuphpawng galaw nna daw dan Minutes – 5 shagrin ai.

Myen Mung shanglawt lu na lajang nga ai ten na Asuya Mu Gun Kongsi de tinang Sam hte Wunpawng Amyu a dat kasa shangun ai shaloi, lawu na ahkyak lamyi ni hpe tang madun, hkrang shapraw sa wa lu na matu lit jaw dat na.

  1. Munghpawm Mungdan hta shang lawm na anhte ni gaw Myen ni hte madang bung, ahkaw ahkang bung, maren mara hkam sha na, Demukresi htung lai tup hkam sha lu na.
    2. Kachin hte Sam dat kasa mung-bawng Salang ni gaw tinang amyu ni a mung dinghku bungli lam ni hpe tinang lit la sa wa na.
    3. Kachin ni Kachin State hpyi ai lam hpe ndai Komiti kaw nna madi shadaw ai.
    4. Myen dat kasa ni hte British Asuya a myit hkrum hkat ai lam ni gaw Kachins hte Sam ni a lam hte n-achya, nseng shangun lu na.
    5. Shanglawt lu ai hpang garan pru mayu yang anhte ra sharawng ai aten hta garan pru ahkang lu ra na, ngu ai Polisi kaba ni rai nga ai.

Ndai Polisi hpe Chins dat kasa ni mung, madi shadaw lawm ai. Dai majaw, U Awng San Ningbaw ai Myen mung masa la ni hte bawng ban jahkrup sa wa na matu, yawng a malai lawu na hte maren Sub Committee hpaw nna lit ap dat ai.

SUB COMMITTEE SALANG NI

  • U Kya Pu ( Sam ) ( 2 ) Maing Pun Saw Bwa ( Sam ) ( 3 ) Sama Du Wa Sin Wa Naw(W/P) (4) Du Wa Zau Lawn (W/P) (5) Salang Hiwa Mung (Chins) (6) Salang Tawng Za Hkup ( Chins ).


PANG LUNG GA SADI.

  1. U Awng San woi awn ai AFPFL (HP.S.P.L) Myen mung masa hpung a dat kasa ni 8-2-1947, shana de Pang Lung du bang ai. British Arthur Bottom Ley lawm sa ai.
    2. 1947-Feb-12 ya shani hkying-11:00 hta Pang Lung Ga Sadi ta masat jawm htu ai.
    3. Ga Sadi shayan No. 9 tup re hpe chye lu ai. (Nau galu wa ai majaw guji guyang nka bang sai, ra ai ten hka ja la na re).
    4. Myen Mung Masa hpung a gawng malai U Awng San Ta masat htu ai.
    5. Wunpawng (Kachins) Salang marai (6) ta masat htu ai. ( 1 ) Sama Du Wa Sin Wa Naw (2) Du Wa Zau Rip (3) Du Wa Ding Ra Tang (4) Du Wa Zau Lawn (5) Du Wa Zau La hte (6) Salang Labang Grawng.
    6. Chins (1) Salang Hiwa Mung (2) Salang Koi Man hte (3) Salang Tawng Za Khup ni re ai.
    7. Sam Saw Bwa ni hte Sam de na salang yawng marai (14) tup ta masat htu ai.(Saw Bwa ( 6) hte Kaga salang (8) re).

WUNPAWNG MUNGDAN ( KACHINS STATE ) MASAT AI HTE SENG AI MABYIN SAT LAWAT LAM NI.

Wunpawng Bum Ga kaw, dai ten Mung Up ai Gum Chying Gumsa hte Gum-Rawng Gumtsa Du Magam ni Uphkang ai lamu ga gaw, atsawm hkrak jarit reng shadaw jun tawn ai, dan leng ai lamu ga jarit masat masa, kum la hpa n-nga ai. Tsan ai hkan ayai aya re nam kahtawng ni sha nga ai majaw, ndai hte mi hte ngu pak di nna Kachin State masat dat na nloi ai. Wunpawng Du Wa ni nga tim, British ni e mare agyi madang hku sha masat tawn ai. Dai re majaw, Part – I ngu masat ai bum ga ginra hta lai nna, Part – II ngu ai Myitkyina hte Bhamo Dist ngu masat lu na re ngu ai.

Dai majaw, Yang Gung e HP.S.P.L Mungbawng Rap Daw kaw tang madun na nga U Awng San Pang Lung zuphpawng hta ga sadi jaw ai. Hkrak nga yang, dai prat, dai aten hta jiwa ni ginru ginsa hkrat nna, madu la tawn sai Wunpawng a shadip jahpang lamu ga grai dam ai re. Lamu ga lu madu tawn ai rai tim, Pa ga de, kahtet, sa-up ai, wawt, ji grawng sawng ai, Hkali Hka waw law ai, Hkum pup hkum pa magra nna hkai lu hkai sha nkam ai. Dai nhkan e, Pa ga lu tawn tim, kaga amyu sha ni hpe nga shangun, galaw sha shangun tawn re majaw, bum ga chyu sha Wunpawng ni a lamu ga re zawn shadu kau ai lam byin ai.

Ga shadawn Myitkyina ngu ai mying a ningpawt gaw, AKYENA ngu ai Sawan Sana Lahtaw Akye Du ni moi hkau na ( Na Mau ) ni galaw sha yu ai hpe la kap nna shamying ai, Sawan Sana Du a lamu ga majing re hpe labau chye ai salang ni yawng chye nga chyalu re. Dai hte maren, Gawk Gwi Pa, Dang De Ga ngu ai mung Lahpai Ga-ra Jingma Naw a prat hta ginru ginsa yu hkrat wa nna, tarn lu tawn ai Ga – Ra Hting Nai Ga rai nga ai.

Dai hte maren, Udi-Uga Ga ni, Lai Sai Mung ni, yawng jiwa ni lu da ai lamu ga, shadip jahpang Chyanun Ninglen ahkang aya hte Uphkang, Jum tek lai wa ai lamu ga ni rai nga ai hpe labau chye ai myit su ni yawng chye nga chyalu sha re ai. Dai re majaw, shawng de na salang ni sumrat masat shagrin da sai Kachin State gaw, Tara shang ai hte Mungkan e mu lawm, Chye lawm chyalu rai nga sai.

Dai majaw, dai ni Wunpawng amyu sha ni yawng asan sha chye na hkat hkrang tawn ra ai gaw;-
DAW – I hta tsun lai wa sai hte maren, kadai mung kadai madu a shadip jahpang mungdan hku kaga ga nga nga ai hpe, British maigan mung maden wa e, hpyen n-gun la ba hte shang gasat magra shanyen la nna, Myen mung, Sam mung, Hkang mung, Wunpawng Mung, ngu ai shadip jahpang lamu ga mungdan kaga ga re ai hpe, shi Uphkang sha na loi daw hku nna sha yawng mayawng hpe magra gum hpawn dat nna, mungdan langai sha re ai hkrang zawn galaw kau ai majaw re. Ning re ai labau nga ai re majaw, teng man ai labau hpe shaprai shamat kau ai lam nbyin hkra, prat ban hte ban tut nawng, matut ndi tinang a lam hpe asan sha chye tawn ra ai re.


MUNGHPAWM MYEN MUNG A NINGPAWT NINGHPANG GAW DA AI TARA (CONSTITUTION OF UNION OF BURMA) A LAM.

  1. Pang Lung e ninghtoi;- 10-2-1947 jahpawt 09:00 hta hpawng ai shaloi, Kachin state hpyi ai hte seng nna la kap tsun ai hta, pa ga, bum, ga amyu baw sang yawng myit hkrum nna Shanglawt la yang, UNITARY STATE ngu ai Mungdan langai hkrang hku hpang de n-gun rawng ai Mungdan langai byin wa na hpe myit mada ai nga ai.
  2. Rai tim, 1947 May shata na HP.S.P.L hpawng kaba hta U. Awng San bai tsun ai gaw, Ginjaw jum manat ai UNITARY STATE hkrang gaw gap yang nhtuk ai ngu tsun matsun ai rai tim, shi si mat ai hpang shi hpaji jaw matsun ai lam ni hpe hpang na ni malap kau ma ai nga nna laika ka sara Hia Myu ka ai labau laika man – 472 hta mu lu ai hku re.
  3. Munghpawm Myen mung a CONSTITUTION hpe 24-9-1947 ya shani Munghpawm Rap Daw e shagrin nna, Myen Mung Shanglawt la ai NU-ATTLEY ga sadi hpe 17-10-1947 ya shani LON DON kaw ta masat ka ai.
  4. Munghpawm Myen Mung Shanglawt lu ai yawng chye sai hte maren, 1948 ning January praw (4 ) ya rai nna, Kachin State lu ai gaw praw (10 ) ya hta rai nga ai.

LAHTA SAM MUNG KAW KACHIN SUB-STATE LU LA AI LAM

  1. British Colony Asuya hte Hpet Sit Japan hpyen ni e dip up sha ai; grau nna Japan gumshem hpyen ni e aja awa, roi rip, yam lu yam sha, jep zing ri, sat nat di ai hpe agying hkam sha ai majaw, amyu kaga wa a lata na tsep kawp lawt ra ai, Shanglawt lu ra ai, madu a buga hte tinang amyu hpe tinang nan Uphkang woi awn nna nga ra sai ngu a myitchye myitchyang, myi hpaw hprang wa sai.

Dai majaw, Japan gasat ai Ranger Dap na Du Wa Kumje Tawng, Kala Mung de bai wa na re shaloi, anhte Japan gasat grai shakut sai, anhte Wunpawng amyu hpe gingdan ai ahkaw ahkang jaw na matu British ni hpe wa tsun ngu ga htet dat ai.

  1. Sam Mung kaw Wunpawng ni hpe Sub-state jaw mi ngu mung up ai British Asuya?
    (Civil Affair Service of Burma) de 3-3-1945 ya shani shawk shawn ai. Du Salang (25) tup ta masat htu dat ai.
  2. Ninghtoi; 1-6-1945 hta kalang kahtap nna hpyi shawn ai. Ndai lang hta Wunpawng du salang (49 ) tup ta masat htu nna shawk shawn dat ai.
    Shing rai Kachin Sub State hpyi ai Komiti hpaw ninghtan dat ai.
    ( a ) Komiti Ningbaw – Haw Wa Du Wa Hkun Hpung.
    ( e ) Ningbaw Malai – Sara Kaba Ebbyu.
    ( i ) Amu Madu – Gapna Du Wa Zau Lawn.
    ( o ) Amu Madu Malai – Sara Kaba Zau Yaw ( Kut Kai).
    ( u ) Komiti Salang ni – Nam Hkyek Du Wa M. Naw Seng hte kaga Du salang, marai ( 9 ) re ai.
  3. Sin Li Saw Bwa e up ai kata na lawt na matu hpyi shawn na lam hte seng nna Wunpawng Du Salang ni 4-7-1945 ya hta zuphpawng galaw ai. Shing rai bawng ban daw dan la nna, 13-7-1945 ya hta du salang marai ( 7 ) hpe dat kasa hku shangun dat ai. Dat Kasa Salang ni gaw;-
    ( a ) Haw Wa Du Hkun Hpung – Komiti a gawng malai.
    ( e ) Ura Bum Du Wa Zau Li – Mung Masha gawng malai.
    ( i ) Sara Kaba Ebbyu – Jawng ni a gawng malai.
    ( o ) Tawng Ok Tu Lum – Tawng Ok ni yawng a malai.
    ( u ) Myu Ok Tu Lum – Asuya Magam Gun ni a malai.
    ( b ) Subada Hkawng Da Naw – Wunpawng Hpyen la ni a gawng malai.
    ( d ) S.L.P ( Balik) Hkawng Hawng – Wunpawng Hpyen la ni a gawng malai.

Shaloi, British Colony Asuya ni Mung Uphkang ai lam garai nlajang ai ten hta e ” SIN LI MUNG NA WUNPAWNG AMYU NI HPE SIN LI SAW BWA E UPHKANG AI KAW NA SHALAWT DAT NI AI” ngu ai laika ka. Saw Bwa wa shi nan ta masat htu nna, Wunpawng dat kasa salang ni a lata hta ap jaw dat sai.

  1. British Colony Asuya, Governor Sir Dorman Smith wa lawm nna, 1946 January Shata 14-16 laman Japan dang ai padang manau Myitkyina e galaw sai. 1946 January shata – 15 ya shani shawa zuphpawng galaw ai. (DAW – IV hta lawm sai). Dai hpawng de Sam Mung na Wunpawng Du Salang ni, Mung Masha ni ram ram du dung lawm sai. Dai shani, Wunpawng sha ni a dailup daihpang nna lahta de Jinghpaw Mung (Kachin State) masat ya mi ngu nna Governor Sir Dorman Smith kaw shawk shawn laika bang sai, Dai shawk shawn laika hta sen htu lawm ai Kachin Sub State na Du Salang ni gaw;-(1) Haw Wa Du Wa Hkun Hpung (2) Gapna Du Wa L.Hkun Seng (3) Subeda Zau Bawk (4) Mung Maw Du Wa Hkun Seng (5) Nam Hkyek Du Wa M.Naw Seng (6) Mung Gu Du Wa Zau Tang hte (7) Namhkyem Du Wa Lum Hkawng ni re.
  2. SIN LI MUNG DINGDUNG DAW HTA KACHIN SUB-STATE MASAT DAI DAW LA AI LAM.

Lahta na NO. 4 hte maren. Sin Li Saw Bwa e Uphkang ai lata na Wunpawng (Jinghpaw) ni hpe shalawt dat sai ngu nna. Saw Bwa wa laika ka, sen htu dat ya sai hte maren, galaw bai shakyet la nna lawng lam lamyi laman No. 15 rawng ai GA SADI LAIKA hpe 9-12-1947 hta lahkawng maga myit hkrum, ta masat htu sai.

Ndai GA SADI LAIKA sen htu ai shani kaw nna lahta Sin Li Mung hta “KACHIN SUB-STATE” ngu ai dai daw dat sai rai. Wunpawng maga na (1) Du Wa Hkun Seng (2) Salang La Hkang (3) Haw Wa Du Wa Hkun Hpung (4) Nam Hkyek Du Wa Naw Seng.


SIN LI SAW BWA MAGA NA

(1) Sao Hman Hpa (Kyen Mong Wa) (2) Hkun Ohn Kya (Amat chuk wa) Ga Sadi Tara shang sai ngu shagrin ya ai gaw, Sao Horn Hpa (Sin Li mung Ginjaw Du Wa).

  1. (1) Kachin Sub-State hpe dai daw la lu sai hte rau Sub-State Council hpe hpaw shagreng dat nna, Sub-State kata na mung shawa akyu ara lam ni hpe aten tup jum tek galaw ya sai.

( 2 ) Mung shawa akyu ara gunhpai ai hta, amyu ru sai, nawku makam masham nlata, yawng hpe tara rap ra ai hku Uphkang, woi awn lai wa sai.

( 3 ) Kachin Sub-State hta lawm ai lamu ga gaw Wunpawng Mung Du ni Uphkang nga ai buga Ginwang ( 45 ) tup re ai. Mung Du ni kadai mung kadai, dai ten Uphkang jum tek nga ai lamu ga Ginwang jarit gara hku rai nga ai hpe Mung Du ni sha n-ga, Wunpawng shawa yawng e mu chye chyalu re majaw, Kachin Sub-State gaw dai Ginwang (45 ) yawng hte rai sai. Kaga kadai hpa tsun na lam n-nga sai.

( 4 ) Sam Mung ( Shan State ) ting a mungdaw mungbawng Rap Daw de shang lawm na matu, dat kasa salang ( mung masa jau ya salang ) dat ai lam galaw sai. 1947 ning hta salang Lashi Gam hte Dingga Du Wa Zau Ba hpe Sub-State Council hte mung masha kaw nna lata shalun dat ai. Sam mung a mungdaw Parliament rap daw de lung ai. 1951-56 ra lata poi num daw ni hta Du Wa M. Zau La hpe lata sharawt ai. Sam Mung Parliament Rap daw de lung nna Kachin Sub-State Hkringmang galaw lai wa sai. 1960-64 ladaw a matu, Nam Hkyek Du Wa M. Naw Seng hpe galai lung shangun na yaw shada tawn rai tim. Gum lang Kongsi Asuya lung mat sai hte maren. Parliament prat dawm, hkring mat sai.

( 5 ) Ya dai ni na ten hta Sam Mung, Kachin Sub-State kata kaw Wunpawng Amyu sha hkrai ( Sen – 1-2 lapran ) nga nga ga ai re majaw, dai tinang amyu sai daw sai chyen ni a lam hpe galoi rai tim, hprai kau mai na nrai.

WUNPAWNG AMYU SHA NI A AMYU SHA MUNG MASA LABAU KADUN, GINJAW KOMITI, WUNPAWNG MUNGDAN SHANGLAWT HPUNG

 

Leave a Reply

Your email address will not be published. Required fields are marked *