Nyaung Taw Mare Makau Na Gate Dawm Kau Ya Na Hpe Kasung Mung Mare Masha Ni Hpyi Shawn Nga

Kasung Mare hte Nyaung Taw mare lapran kaw Myen hpyen dap ni Gate jahkrat nga nna lai wa lai sa mung mare masha ni hpe jahkring, jep shatsang ai a majaw mare masha ni hkawm sa hkawm wa yak hkak nna Gate dawm kau ya na matu ra sharawng nga ai hpe chye lu ai.

Lai wa lai sa Kasung, Zupmai mung mare masha ni hpe Nyaung Taw makau kaw shara jahkrat nga ai Ts.K.Hk (381) ni kawn hkap jahkring jep ai lam, mungchying masat nlawm yang n shalai ai lam, mungchying masat ni hpe la da ya nna wa maga bai jaw na ngu tsun ai lam, n-gu ni htaw wa ai ni hpe mung n-gu ni la ya ai lam, Num ma ni lai yang yu nhtuk nan re ai lam ni galaw ai nga nna Kasung mare masha langai tsun ai kaw na chye lu ai.

Mare masha ni gaw Nyaung Taw, Myo Thit hte Nammati hkan tamlu tam sha ra ai majaw dingyang hkawm sa hkawm wa nga ma ai re, ya na zawn Myen hpyen dap ni hkap jep ai marang e n-gwi hkawm sa mat ai lam, yi sun hkau na galaw sha ai mare masha ni mung hkawm sa na hpe hkrit tsang nga ma ai lam Kasung mare masha langai tsun ai.

Myen hpyen dap Ts.K.Hk (381) ni Gate jahkrat da ai majaw mare masha ni kawn Jinghpaw mungdaw hkringmang daju hpang de moi na zawn wanglu wanglang hkawm sa mayu ai lam, ya na zawn hkap jep ai marang e tam lu tam sha na matu mung yakhkat nga ai majaw Gate jahkrat nna hkap jep nga ai Myen hpyen dap hpe lawan dawm kau ya na matu September (6) ya shani laika tang shawng da ai lam chye lu ai.

Kasung, Zupmai mare masha ni gaw lai wa sai August (11) ya shani Myen hpyen dap ni mare kata de htim gasat shang wa ai majaw Lambraw Yang mare de hpyen yen ra mat ai re, August (16) ya shani hpyen yen mung masha ni hpe Jinghpaw mungdaw hkringmang daju sa du gawan ai shaloi ဒုစကခမႈးဗုိလ္မွဴးၾကီး ေက်ာ္ထြန္းခုိင္ kawn tinang a mare buga de alum ala bai wa nga mai ai ngu tsun ai majaw PCG hte Nawku Hpung shagu na hpung woi sara ni, mare Salang. ni bawngban nhtawm August (22) ya shani mare de bai wa nga ai raitim ya na zawn hpyen dap shara jahkrat nna hkap jep nga ai gaw mare masha ni a shimlum lam hpe a htu hkra shangun ai sha n-ga mare masha ni hkawm sa hkawm wa, galaw lu galaw sha yak hkak hkrum nga ai lam matut na chye lu ai.

 

Leave a Reply

Your email address will not be published. Required fields are marked *