Man Maw Robert IDP Na Ramma Langai Nhtu Hte Kahtam Sat Hkrum

Man Maw Robert IDP kaw nga ai Lahpai Zau Ding gaw September (8) ya shana guide sa ai ten nhtu hte kahtam sat da hkrum ai lam na chye lu ai.

 

Lahpai Zau Ding tsang (9) jawng ma gaw shana guide sa ai aten jawng nlung ai shinggan na manang ni cycle hte htaw woi mat wa nna Gaw Ya Hka nawng makau kaw ga law hkat wa ai hpang nhtu hte kahtam sat kau hkrum ai re, Zau Ding a moi mang hpe cycle hte bai htaw wa na (နာရီစင္) makau kaw cycle hte hpawn, sai hkrai hkrai rai jahkrat da ai lam Robert IDP dabang up Sara Tang Gun tsun ai.

 

Lahpai Zau ding gaw shawng de mung manang ni hte jahkring hkring ga shawng shai hkat nna gali ga law hkat ai lam law law byin lai wa sai re nga nna mung Buga masha ni tsun ai.

 

Asak si sum mat sai Lahpai Zau Ding hpe sa htaw mat wa ai manang marai (6) gaw balik ni du wa yang hprawng mat ai raitim balik ni bai lu rim la nna Man Maw balik rung kaw san jep nga dingyang re, Lahpai Zau Ding a moi mang hpe September(9) ya shani makoi mayang na re lam hpe mung chye lu ai.

Leave a Reply

Your email address will not be published. Required fields are marked *