Nam Shan Lapu Pu Noi Mayu? Hkrum ai Zawn Rai Wa Sai Kun?

Myen hpyendap gaw shanhte maja woi galaw ai npawt nhpang gaw da ai mungdan tara ni hpe May shata hta mung shawa a madi shadaw hkam la ai lam galaw na matu ndau nga sai. Madi shadaw shagrin hkam la ai lam pi n lu galaw ai laman nan 2010 ning hta ra lata shingjawng poi galaw na lam shana wa sai. Ndai lam hpe madi madun let mung masa ningbaw ni gaw mung masha kaw nna npawt nhpang gaw da ai mungdan tara hpe madi shadaw ai mi raitim, n madi shadaw ai mi raitim, SPDC gaw myi di chyip shagrin galaw sa wa woi na re hpe asan sha mu lu nga masai. UN a dat kasa Ibrahim Gambari hkrumzup bawng ban ai lam hpe kade shakut yu tim, SPDC gaw shanhte a ?road map? hpe hkrang shaleng galaw sa wa nga masai. Rap ra ai lam nga hkra gram na matu Gambari (UN mungkan ting) hpaji jaw tim ning dang kau ya nga masai.
Dai hku byin ai lam ni hta, Miwa, Thai, Singapore , India hte ASEAN mungdan ni a ja a wa ninghkap ai lam nnga ai majaw madung rai nga ai. Ndai htingbu mungdan ni hpa majaw n ninghkap ai sha, SPDC hpyen asuya hte jawm ganawn hpaga galaw nga a ta ngu maram yu yang, Thai hpe yu ga, lama na Munghpawm Myen mung wa democracy lu wa yang, shanhte hta ra ai n hprang gun rai ni nlu wa na, shanhte mungdan hta grau galu? kaba wa na lam ni hpe nra ai majaw ngu nna mung mai tsun nga ai. Htingbu wa jam jau nga yang, gumhpraw law law hkoi jaw nhtawm, amyat (interest) law law la ai htingbu wa hte bung nga ma ai. Kaga hting bu mungdan asuya mi raitim, dai lachyum hte SPDC hpe ganawn nga ma ai. Dai mungdan ni a htingbu mungdan policy chye ai SPDC gaw shanhte galaw mayu ai mai galaw nga na matu mahkrun rai nga malu ai. Kade nna yang, Singapore dollar hte Myen mung gumhpraw dum hta gumhpraw mai bang wa sai lam ni, Miwa, Thai ni hpaga lam hpe jat galaw wa ai lam ni gaw Myen hpyen asuya hpe madi shadaw nga ai lam ni re hpe dum ra nga ga ai.

Anhte amyu sha ni gaw Miwa, Thai, Gala mungdan asuya ni hpaga shang galaw ai majaw bungli lu ai, ngu sawn la mai ai zawn; shanhte Myen hpyendap hpe bau lawm ai, tinang ginra hta masha wa kaw nchyang galaw sha ra ai, hkam sha lu ra ai ram anhte hta ahkyu hkam sha ai lam nnga ai ni hpe mu lu nga ai. Dai majaw, anhte buga hta Miwa ni a hpaga lam ni hpe ninghkap ra nga ga ai. Ndai Miwa hpaga la ni a majaw hkrat sum ai lam gaw hti pi ndang na ram rai nga na sai. Maga mi de anhte grai akyu hkam sha ai zaw raitim; hkrat sum ai lam, shanhte akyu hkam sha ai lam ni gaw grau law nga ai hpe mu lu ai.

Ndai zawn mungdan kaba hte htingbu ai anhte amyu sha ni a mung masa shamu shamawt ai lam ni mung moi shawng de na hte grai galai shai mat nga sai. Shawng de jarit mayan hta ndut ndang hkawm sa mai nga ai anhte amyu sha ni, dai ni nmai mat nga sai. Ndai masa lam ni byin nga ai aten hta mungbawng rapdaw (National Convention) hta shang lawm lai wa sai anhte amyu sha mung masa uhpung ni mung SPDC woi awn nga ai mung masa mawru hta gade mi nra sharawng ai raitim, gau ngwi ngwi hkan lawm nga taw sai hpe mu lu ai. Myen ni bawng ban shalawm ai, myit yu ya ai lam nnga tim, Mungbawng rapdaw a hpungdim dat zuphpawng hta anhte amyu sha ni a matu ra sharawng ai lam 19 hpe tang shawn mara da nga masai. Daw Suu Kyi a ndau laika hpe ninghkap na lam SPDC tsun ai shaloi ninghkap ai lam n galaw nga ma ai. SPDC a ndau laika 1/2008 hte 2/2008 ni hpe lakap nna, KIO kaw nna ?mung masha madi shadaw hkam la ai lam (referendum)? galaw yang SPDC galaw, hkan sa ra ai lam ni hpe mung 20/02/2008 ya shani ndau shabra nga sai. Dai lam ni gaw grai kaja ai lam ni ngu mu mada ai, raitim, BBC hta KIO dinggrin ginjaw du kaba langai a ga san, ga htai galaw lai mat wa ai gasi langai hpe bai hta nna maram yu ga nga yang, ?ndai lam hpe SPDC mung chye na ra ai, maja mi nmai ai hpe shanhte chye na re ai? ngu nna tsun lai wa sai. Maja laknak jahkrat woi ai lam galaw yang anhte amyu ni hta yak na re lam hpe anhte Jinghpaw mung masa ningbaw ni Myen hpyendap hpe shana da nna, gau ngwi ngwi Myen hpe ninghkap masu nna, nam sham lapu pu noi e mayu hkrum ai zawn galaw woi nga ai kun? ngu nna maram lu ai.

Grau nna Laiza zawn re KIO ginjaw ginra hte NDA-K ginjaw ginra ni hta Myen asuya a mung masha pru shang gawn hkang dap (immigration) magam gun ni nan sa du nna masha jahpan bang woi wa ai gaw, KIO magam gun kade nga ga ai, NDA-K magam gum kade nga ga ai ngu ai lam hpe SPDC de masha jahpan jaw hpang wa ai lam re hpe mu lu ai. Laknak n gun kade nga ai lam ni mung jaw kau ngut sai kun ngu nna pi sawn maram lu ai. Tinang madu uphkang mungdaw, mungdan (ginra) hta SPDC jaw ai je lap (white ID card) lang nna hkawm sa lu na gaw, anhte yawng shatawng shada da ai mung masa ahkaw ahkang ni re kun? Dai ni anhte kam hpa nga ai mung masa uhpung gaw anhte amyu sha ni a ahkaw ahkang hpe lu hkra woi gasat, hpyi nga ai kun? nlu tim anhte gaw hpyi yu saga ai, ngu nna labau hta ngam taw na matu sha woi galaw nga ai kun? SPDC gaw kaja wa tsawra myit rawng ai dinghku kawa nre kata hta, an nau ni a rawt galu kaba lam, ra sharawng ai lam ni nlu tim, SPDC woi awn gawgap, woi lakawn sa wa ai dum nta hta anhte amyu ni nga ra mat na hku rai nga saga ai kun?

Mung shawa ni pu noi mayu hkrum ai ?nam shan? n tai na matu;
– May shata na mung shawa a madi shadaw hkam la poi lamang hta nshang lawm ai lam galaw ga.

– Jahkrit shama nna sa bang hkrum yang, ?N’ra sharawng ai?/ ?NO? ngu nna ra lata mai sau ?vote???? hta bang sa wa ga.
– Marai kade jahkrit shama nna sa bang hkrum ai, vote pung galai ai, shamat ai, lagu ai lam ni hpe??? matsing zumhting sa wa ga.
– Brig-Gen Thein Zaw sa gawan nna GSM phone, landline phone, n gu, sau jaw ai lam ni hkam la lu??? nga sai buga hpung ni mung, asuya jaw ai made yawng lu hkra la nna, kaja wa shanhte hpe vote??? bang aten hta ?NO? kaw bang nna, jaw ai, tara ai lam maga tsap nga na ma ai ngu kam kaba let.
Mung masa hpung ni;
– May shata na mung shawa madaw lamang hta nshang lawm na.
– Shanhte dang yang/ sum yang hpa matut galaw sa wa na (strategic hpawng nan galaw na).

PS: Ding lun, htai lai, myit sawn yu ai lam nga yang she rawt jat galu kaba wa chye nga ai re majaw; kade nchye n kaw raitim mu mada ai hte mi ding lun, htai lai, myit sawn maram lu ai made hpe ka shaleng dat ai rai. Kaja ai hte mi la, n kaja ai hpe kau, shada hpaji jaw, ning mu galai yu ga. Tinang dai ni lu, dai ni sha na sha tam bram sha nga yang gaw nmai sai, ahkayk ai aten hta shamu ra ai, shaga ra ai, dai nrai yang tinang dum nta wa masha chyasam ni madu sha wa nga sai law, maigan du hpu nau ni e.

Ndai laika ngau gaw Malihkrang a mung masa ningmu sha re.

Leave a Reply

Your email address will not be published. Required fields are marked *