Myen Hpyen Hpung Ni Mung Shawa Dum Nta Hte Hpaji Jawng Nat Kau Ya

KIA Masat (27) Dap Dung ginra, U Lang Pa Ginwang Daw, Pung Ling Dingsa mare kaw sa du nga ai Myen hpyen hpung ni gaw February (11) ya shana daw hkying (4:00)Pm daram hta salang Maru Yaw a nhta hpe wan nat kau jahten kau ya ai sha n-ga Laika sharin Jawng hpe mung Wan nat jahten kau ya ai re lam buga masha ni shana wa ai, dai ginra hta Myen hpyen dap ni kawn atik anang Mung mare masha ni hpe mare kata kaw nna gawt shapraw nga ai majaw Je Sawn hte Mung Lung mare na Mung shawa htinggaw (40) daram February (11) ya shani Mung hkawng hpyen yen dabang de htawt sit mat sai lam na chye lu ai.

Mung Hkawng mare kaw Dap jung nga ai Myen hpyen Dap ni gaw lai wa sai February (10) ya shani jahtum tawn nna Laika mare, Zup Ja mare, Hka Wan Pa mare, Je Sawn mare, Mung Lung mare, Hpaga Rai mare, Kung Hka Pa mare, Hka Pra Yang mare, Nam Hpu mare hte Mahkaw Yang mare hpe pat hkum gai wang masat nna pru mat na matu ndau da ai raitim Mung shawa ni gaw tinang dusat yam-nga, yi sun hkauna hpe tawn kau na matu yakhkak ai majaw n htawt sit lu shi ai hpe Myen hpyen hpung ni gaw ya na zawn masing nga nga mare ni hpe Wan nat jahten nna Mung mare masha ni hpe gawt shatsang nga ma ai re.

Myen Hpyen Hpung ni gaw Pat hkum gaiwang masat tawn ai ginra na mung mare masha ni hpe Mung Hkawng Hpyen Yen Dabang kaw sa htawt nga na matu tsun ai raitim Munghkawng hpyen yen Dabang na hpyen yen mung shawa ni hpe Myen hpyen hpung ni kam mara rim woi ai lam, mara kata zingri sat kau ai lam ni lang hte lang nga lai wa sai majaw Munghkawng Hpyen yen Dabang  de wa htawt nga na matu hkrit tsang nga ma ai re.

Lai wa sai February (9) ya shani hta mung Bum Chyang mare kaw hkau na galaw nga ai Slg. Mawng Sam hte salang Labang La yan hpe mung Myen hpyen hpung ni mara kata rim woi mat ai re, mare salang ni hte nta masha ni hkan tsun sagawn ai majaw February (10) ya shani shan hpe bai dat ya ai lam na chye lu ai.

KIA Masat (4) Dap Ba, Masat (8) Dap Dung ginra kata Nam Hu kaw du nga ai Myen hpyen hpung ni mung February (3) ya shani Zup Awng hpyen yen dabang kaw nga ai salang Dau Gyung asak (52) ning hpe mara kata rim woi mat wa ai re, Hpyen yen Dabang na salang ni kawn gumhpraw Kyats (300,000) sa jaw nna she salang Dau Gyung hpe bai sa woi shaw la lu ai re, ya na zawn Myen hpyen hpung ni shamu shamawt du ai Hpyen Yen Dabang ni hkan mung mare masha ni hpe mara kata rim zingri sat ai lam ni galaw ai majaw Mung mare masha ni hpyen yen Dabang kaw du nga tim shimlum ai myit hte nlu shanu nga ai lam buga masha langai shana wa ai.

 

Leave a Reply

Your email address will not be published. Required fields are marked *