Mangshi Mungkan Manau Poi hta Amyu Sha Dawnghkawn kap ai palawng hpe Manau poi komiti ni hkum pat

Miwa Gumsan Mungdan, Sakhkung Mungdaw, Mangshi kaw galaw ai Mungkan Manau Poi hta Wunpawng Htunghkying maka nhtu chyik chyai kap ai palawng hpun da ai Mangshi Wunpawng Ramma ni hpe Manau poi yu reng komiti ni kawn Manau nshang nau shangun ai rai nna palawng hpe gale hpun kau ai hpang she Manau shang nau lu ai hpe na chye lu ai.

Mangshi Wunpawng Ramma ni gaw March (2) ya shani Manau shang nau na matu Manau poi komiti ni hpe jau tau tsun da ai lam nga ai raitim manau shang nau mahka kaw sha Miwa Asuya balik ni nchye na ya na hpe tsang ai ngu Manau Poi komiti wa tsun nhtawm Manau shang nau na rai yang pawlawng naw sa galai kau mu ngu tsun ai raitim Mangshi Wunpawng ramma ni gaw laga buhpun palawng n hkyen sa ai re majaw palawng hpe gale hpun kau nna she shang nau ai re lam ramma langai tsun shana wa ai.

Mangshi Manau Poi komiti ni gaw nhtu chyik chyai kap ai palawng hpun da ai Mangshi Wunpawng Ramma ni hpe dai palawng hpun na Manau n shang nau shangun ai sha n-ga Miwa Salang nkau mi kawn mung shinggan kaw dung nga nna nhtu chyik chyai kap ai palawng hpun dan ai masha marai (2-3) hpe mung palawng gale hpun kau shangun ai lam nga ai hpe na chye lu ai.

Ntu chyik chyai gaw Wanpawng Amyu sha ni a htunghkying maka kumla langai re majaw Wunpawng Amyu sha dawnghkawn kaw mung kap ai re, ndai dawnghkawn hpe Wunpawng amyu sha ni shanu nga ai Mungdan shagu hta lamang poi amyu mayu nga yang lang lajang nga ma ai re hte Palawng ni hkan mung Wunpawng amyu sha kumla shadan shadawng na matu shakap lang ma ai re.

Photo; credit

Leave a Reply

Your email address will not be published. Required fields are marked *