KBC Amu Madu, Mungga Hkran buga hkalup hpung a KBC Masat Laban Nhtoi lamang sa du shanglawm

Jinghpaw Wunpawng ni kaw shawng nnan hkalup sasana shang ai Mungga Hkran buga, Bum Wa mare kaw March (11) ya shani KBC Amu madu hte rau KBC Masat nhtoi nawku lamang galaw ai lam Nhkawng Pa Dabang Amu madu Salang kaba Maru Brang Mai shana wa ai kaw na chye lu ai.

Sara kaba Rev. Dr. Hkalam Sam Son hte hpung ni gaw Nhkawng Pa hpyen yen dabang kaw March (7) ya shani wa du nhtawm hpung masha ni hpe Chyum Laika sharin ai lam, machyi makaw ai hpung masha ni hpe gawan gatsan akyu hpyi ya ai lam, Nawku jawng dingshawng shang ai lam, Hkalup hkam ya ai lam ni mung galaw ai re. Hkalup hkam la ai hta hpung masha marai (13) hkam la sai lam Mungga hkran Buga hpung a mu madu Saranum Lazing Hkawn Ra tsun ai.

KBC Masat Nhtoi lamang hta KIA Masat (3) Dap Ba Up hte magam ni mung sa du shanglawm ai rai nna hpung masha ni yawng marai (300) jan shanglawm ai re.

Mungga Hkran Buga hkalup hpung gaw gaw lai wa sai 1882 ning March (19) ya shani shawng nnan Sara kaba Robert hkalup sasana shang ai Bum Wa mare na buga hpung re hte shaning shagu KBC Masat Laban Nhtoi galaw ai re. 2011 ning Myen Hpyen Dap hte KIA ni majan bai byin wa ai kaw na Nhkawng Pa hpyen yen dabang kaw buga hpung de nna nga ai re hpe mung chye lu ai.

Photo; L. Hkawn Ra

Leave a Reply

Your email address will not be published. Required fields are marked *