38 lang na KBC hpung shawa zuphpawng ngut kre

(38) lang na KBC  hpung shawa hpawng kaba hpe Wai Maw Ginwang Muk Chyit Buga kaw March (22-25) ya shani du hkra galaw ngut kre la lu sai re hte March (26) ya shani hta gaw du sa ai hpung shawa masha ni tinang buga de bai nhtang wa sai re lam chye lu ai.

Buga ginra de bai nhtang wa na buga masha ni hpe poi komiti ni kawn lit la nna mawdaw daru, Wanleng daru, nbung li daru du hkra wa sa ya ai re. Poi wang kata jasan jaseng lam hte gin sum run ai lam ni hpe Waimaw Ginwang kata na apnawng dawjau Ramma ni kawn matut manoi galaw nga ai rai nna 2-3 ya laman hta gaw yawng ngut kre lu na re nga nna lit nga ai ni tsu sha na wa ai .

Ndai Hpung Shawa Zuphpawng  hta KBC Ginwang shagu na hpung shawa ni, Oversea  Kachin Baptist Church  kaw na hpung shawa ni Sinpraw hkran, Sinna hkran Sasana de na hpung masha ni yawng marai (40,000) daram sa du shang lawm ai rai nna 2018 shaning kaw nna 2022 shaning du hkra na KBC ningbaw ningla ni hpe mung lata san da lu sai re hpe chye lu ai.

KBC a hpung shawa zuphpawng hpe (4) ning hta kalang galaw ai rai nna du wa na 2022 shaning hta gaw Sam Mung Ginwang kaw bai galaw saw a na re hpe chye lu ai. Zuphpawng galaw na shara hpe gaw Sam Mung Ginwang Komiti ni kaw na bai lata san na re hpe mung matut chye lu ai.

 

 

Leave a Reply

Your email address will not be published. Required fields are marked *