Yawn Hkyen Shiga

Amyu sha ni yawng a tsawra kam hpa hkungga ai Sara Kaba Rev. Dr Lahtaw Gum Se asak (86) ning gaw 2018 ning April 14 mashang ya jahpawt hkying 8:30 Am ten hta Myitkyina Muklum, Aye Thu Hka tsi rung kaw madu yesu hta yup pyaw mat sai lam chye lu ai.

Rev.Dr Lahtaw Gum Se gaw Mungmyit Kudawng Ga, Man Seng Mare na Du Wa Lahtaw La Raw hte Du Jan Nhkum Ja Hkawn a kasha ma Gam rai nna,1933 Sep, (10) ya shani  hta shangai chying hkai wa ai re.

1941 May (11)  hta Nam Baw Mare kaw jawng lung hpang nna May Myo Colgate, (Pyin Oo Lwi) Jawng kaw 1950-52 hpaji ladaw hta tsang 10 hpe awng la lu sai re.1953 -54 shaning laman hta gaw Kutkai Chyum Jawng wa lung la nna 1955 ning hta “Willis And Oleando Divinity School, Insein” ya gaw Myanmar Institute Of Theology-MIT kaw nna B.Th chyum Janmau hpe 1959 October shata hta Center Union Theological Seminary, Kensus University kaw na jaw shagrau ai hpe hkam la lu ai.

1959 April shata kaw nna Kutkai chyum jawng kaw sara galaw hpang wa ai 1963-66 laman United Theological Collage, Bangalore, India kaw nna Dip. Theo. lakmat hkam la lu sai. 1966 ning May 29 hta Myikyina kaw galaw ai JHZ mung zuphpawng hta Jinghpaw Wunpawng chyum jawng a jawng up dang san la hkrum ai re.

1966 June (6) hta chyum jawng hpe Kutkai kaw nna Nawng Nang,Myikyina de htawt la nna chyum jawng up magam bungli hpe 1993 du hkra gunhpai lai wa ai Sara Kaba re.1983 shaning MIT kaw nna B.D chyum jawng Janmau hpe gup la lu sai.1978 shaning kaw nna 15 ning tup Chyum Dakkasu n byin n mai masing jahkrat woi awn lai wa sai re.1990 -91 ning laman Bethel Seminary,USA kaw nna Post Graduate Program hpe sa du sharin lai wa sai re. KBC kata hte amyu sha lam yan ni hta Komiti,dap shagu ,ginwang shagu buga shagu hpaji jaw sharin achyin ya ai lam ni hpe galaw lai wa ai.2002-2007 ning laman hta Jinghpaw Wunpawng Htunghking shingni jawng (Kachin Institude of Culture and Arts (KICA) hpe mying dai daw woi let jawng up lit hpe mung gunhpai lai wa sai re

Sara Kaba Rev. Dr Lahtaw Gum Se gaw MIT kaw nna FDCS= The fellow Of Distinguish Chritian Service ngu ai (Hkristu a magam bungli hta lak lai kangka sadi dung ai) shagrau Janmau hpe mung hkam la lu ai re. Jinghpaw Wunpawng Chyum Hkawlik kaw nna mung Principal Emeritus ngu ai shagrau jawng up hpe shagrau sha-a ai lam galaw lai wa ai.  2008 March 24,28, hta galaw ai Jinghpaw Wunpawng Chyum Jawng, Hkawlik (75) ning hpring Lung Seng Jubili Hte Chyum Hkawlik a (58) lang na jawng yu poi Kaba Hta Sara Kaba Lahtaw Gum Se hpe Doctor Of Divinity ngu ai Shagrau Chyum Munu Janmau hte shagrau sha-a ai re.

Rev. Dr. Lahtaw Gum Se gaw 1966 May shata 14 shani kutkai, Lahkam Kahtawng na Tsi Saranum Sister Tangbau Lum Nan hpe Rev. Lahpai Zau Yaw a lata hta hkungran dinghku de ai rai nna n shang hkrat kasha Num (l) la (2) lu ai re, shi a ngam nga ai hkum tsawp moi mang hpe April (18) ya shani hkying (1:00) Pm hta Emanuel buga dum n-ta kaw kyuhpyi la nna Nawng Nang Jinghpaw Wunpawng Chyum Datkasu Wang AD 2000 masat gawk nu kaw hkungga shagrau tawn ai lam galaw na rai nhtawm April (19) ya jahpawt hkying (10:00) Am hta makoi mayang akyu hpyi nna Jaw Bum Wunpawng Lup Ding Lup Ra hta lup makoi ai lam galaw sa wa na re hpe chye lu ai.

Leave a Reply

Your email address will not be published. Required fields are marked *