Jarit Mayan Hpyen Yen Ramma Shawa Sharin Hpawng Galaw Na Matu Hkyen Shajin Magang Sai

Ginjaw Ginra Ginwang Ginjaw Jarit Mayan Hpyen Yen Ramma shawa hkrumzup sharin hpawng hpe du wa na bat April (23) ya shani kaw nna April (28) ya shani du hkra Alen Bum Hpyenyen Lahta Tsang Jawng kaw galaw sa wa na  matu hkyen lajang hpang nga sai lam na chye lu ai.

Sharin hpawng lamang hpe madu tai woi awn na rai nga ai Hpum Lum Yang Hpyenyen Dabang shawa ni gaw daini kaw nna shara hkyen, jasan jaseng bungli  ni hpe galaw hpang nga sai rai nna sharin hpawng aten laman shim lam hte seng ai lam, shadu kachyawng ai lam, san seng san pan lam hte dawjau ai lam magup hta madu tai woi awn galaw sa wa na  matu hkyen lajang nga ga ai nga nna Dabang Up Slgkb Tang Gun tsun shana wa ai.

Dai ning na sharin hpawng kaw Ginjaw Ginra Ginwang Ginjaw Jarit mayan hta nga ai ramma ni sha n-ga, Pa ga de na hpyenyen ramma ni, Hpyeyen Dabang shinggan de pru hkawm nga ai ramma ni, Sinpraw Ginwang Ginjaw de na ramma kanau kasha ni hte Jauman ramma ni yawng hpe saw shaga da ai lam nga ai. Ramma ni hpe Ginjaw Komiti kaw nna mung ramma ni hte hkrum shaga ai lamang re nga nna Jarit Mayan Hpyen yen Ramma Komiti Ningbaw Rev Tu San Awng tsun ai.

Ndai zawn Ramma shawa sharin hpawng hpe 2014 ning kaw nna galaw hpang wa ai re, lai wa sai shaning 2017 shaning hta gaw hpyen masa mungmasa a majaw gan jahkring da ra mat ai lam hte Daining gaw kalang bai n-gun da ting let (4) lang ngu na sharin hpawng hpe woi awn galaw sa wa ai re nga nna Komiti Ningbaw wa matut tsun ai.

Jarit Mayan Hpyenyen Ramma Shawa Sharin hpawng hpe Zai Awng Camp kaw shawng nnan galaw hpang ai rai nna, No. (2) Lang Ngu Na sharin hpawng hpe Maga Yang Camp kaw galaw ai hte No. (3) Lang Ngu Na sharin hpawng hpe Je Yang Camp hta ramma marai (1000) mi jan sa du sharin ai lam nga lai wa sai re hpe mung na chye lu ai.

Leave a Reply

Your email address will not be published. Required fields are marked *