Chyat rawng nga ai hpyen yen Mung shawa ni nam de bai kahtap hprawng yen nga

Majan  a majaw chyat rawng nga ai  Danai Awng Lawt mayan na hpyen yen Mung shawa hkying mi jan gaw April 17 ya shani Myen hpyen hpung ni laja lana htu shadut wa ai majaw nam de matut hprawng koi yen hkawm ra mat ai lam ginra masha ni shana wa ai.

Hpyen yen Mung shawa ni gaw shanhte koi yen nga ai mare makau  hkan  Myen Hpyen Dap ni du shang wa nna  hkrit kajawng ai hte nam  de dum bri dumbra rai kahtap hprawng yen hkawm ra ai re.

Ya aten hprawng yen hkawm nga ai hpyen yen Mung shawa ni hta asak kaba ai gumgai dingla ni, Ma kaji ni, shata mi nhpring shi ai ma kanu ni, mi kaw na  machyi let  hprawng hkawm ai ni, bawm hkala sawng nna mare de tsi tsi hkam la na matu yak hkak ai ni yawng marai 2000 daram nga ai hte ya aten hpyen yen Mung shawa ni gaw malu masha tsi mawan grai yak hkak jam jau nga ai lam buga masha ni sha na wa ai.

Chyat rawng nga ai hpyen yen mung shawa ni lawt wa lu na matu lam mahkrun hpaw, garum ningtum jaw ya na lam hte seng nna Danai Myen Hpyen Dap D.K.Ts de tang  shawn da ai  raitim ahkyak nla ya ai majaw Jinghpaw Mung daw hkring mang daju hpang de laika tang da ai lam nga ai rai tim bai htang shana wa ai lam n nga shi ai majaw KBC, RC, Englikan hpung ginjaw hte PCG de mung laika tang shana da sai hte maren  hpung shagu na salang ni kawn  April 17 ya shana hkying 7:00 PM aten hta Jinghpaw mungdaw Hkringmang Daju hte hkrum bawng ban na matu tsun jahta da ai re hpe mung na chye lu ai.

Leave a Reply

Your email address will not be published. Required fields are marked *