Myen Hpyen Dap kawn rim woi mat ai mung shawa ni hpe bai dat ya ai lam nnga

Myen Hpyen Dap kawn rim woi mat ai Lai Nawng Hku mare na mung shawa ni hte KTCS na ap nawng Sara/Sara num ni hpe bai dat ya ai lam nnga shi ai re.

Rim woi hkrum mat ai mung shawa marai (156) hte KTCS ap nawng Sara (1) Sara num (2) yawng marai (159) hpe bai dat ya ai lam nnga shi ai majaw Buga kanu kawa ni hte Nawku hpung ni kawn Hpakant Byu Ha Mu de (April 16) ya shani wa tsun yang dat ya na re ngu tsun ai lam, April (17) ya shani hta Chyawng Wa P.T.Ts dap kaw nna Mung shawa ni hpe bai dat ya sai raitim Lawa Pa kaw na bai rim woi da ai lam buga masha ni shana wa ai.

April (18) ya jahpawt hta mare salang ni hte buga kanu kawa na ni kawn hkali hte sa tau na ngu ai hpe Kamai Byu Ha Mu kawn shimlam hpe nlu lit la ya ai ngu tsun nna pat hkum da ai majaw Jinghpaw mung hkringmang daju hpang de bai tsun nna ahkang lu yang she bai sa tau la na lam buga masha ni shana wa ai.

Lai Nawng Hku Mung mare masha ni hte KTCS na ginhtawng ap nawng Sara/Sara num ni hpe Myen hpyen dap kawn April (11) ya shani rim woi mat nna Phone ni mung yawng zingla kau ya ai re hpe chye lu ai.

Myen hpyen hpung ni gaw majan ginra na hprawng pru wa ai mung mare masha ni hpe ndat ya ai lam gaw shawnglam ginra hta Mung shawa ni hpe masha ninggang shatai ai masa re ngu hpyen masa maram masam nga ai ni tsun nga ma ai re, ya aten Awng Lawt mayan na mung mare masha marai (2,000) daram hpe mung Myen Hpyen dap ni pru wa na matu ahkang njaw ai majaw majan lapran kaw naw chyat rawng taw nga ai re hpe buga masha ni shana wa ai.

Leave a Reply

Your email address will not be published. Required fields are marked *