ShaNgaw Kaw Hpyen Yen Nga Ai Hpyen Yen Mung Masha Ni Waimaw De Du Shang Wa

Jubali, Walawng Yang, Sut Ja, Au Ra hte Ndung Zup mare hkan na mung mare masha ni gaw lai wa sai bat lahkawng daram kaw nna Myen hpyen hpung ni KIA masat (4) Dap Dung ginra de htu shadut htim gasat wa ai majaw KIA hpyen hpung ni hte gasat gala byin nna ShaNgaw mare de hpyen koi yen nga ai kaw nna May (15) ya shani Waimaw muklum de pya pya rai htawt yu wa ai lam na chye lu ai.

Shangaw kaw hpyen koi yen nga ai mung mare masha ni hpe garum ningtum ni mung nmai sa, hpa mung nmai galaw sha re ai majaw ya na zawn Waimaw muklum de bai htawt yu wa ai re lam Rev. Brang Mai tsun ai.

Hpyen yen mung mare masha ni gaw Shangaw kaw na mawdaw hkan jawn nna pya pya rai nna yu wa ai re, ya aten du hkra gaw masha marai (40) daram du nga sai lam, du na laban shani du hkra rai yang Waimaw muklum de hpyen yen mung shawa marai (300) daram du hkra matut manoi du shang wa na masa nga ai lam Garum kahtau hpung ni maram da ai lam na chye lu ai.

Ya aten hta gaw hpyen yen masha ni hpe nawku jawng wang na gawknu hkan gan nga shangun da ai lam, aten galu rai wa yang na matu gaw ginsum nta ni gap na matu yaw shada da ai lam Rev. Brang Mai matut tsun ai.

Mare de Yi, Sun hkau na, dusat yam nga ni law law tawn kau da ai, jawng mung pat kau sai re majaw ma ni a hpaji lam a matu mung tsang ai majaw Waimaw kaw jawng shalun na ngu gaw myit da ai nga nna hpyen yen wa ai mung mare masha langai tsun ai.

Ya aten hta hpyen yen masha ni yawng ndu wa shi ai re majaw matut nna gara hku galaw sa wa ra na ngu ai hpe tup hkrak nchye lu shi ai lam, Hpyen yen masha ni yawng du wa yang she gara hku hparan sa wa na ngu ai hpe bai matut bawngban na re lam na chye lu ai.

Leave a Reply

Your email address will not be published. Required fields are marked *