Myen Asuya hte Myen Hpyen Dap kawn Danai hpyen yen ni ni hpe hpyen yen hku nhkap la ai lam tsun

Myen Hpyen Dap ni kawn Awng Lawt mare na hpyen hprawng wa ai hpyen yen mung shawa ni hpe Awng Lawt mare de bai wa nga na matu tsun shadut nga ai raitim mare masha ni gaw myen hpyen dap ni nga yang gaw anhte wa nga na matu nmai byin ai ngu nhtang tsun ai lam ni nga ai re hpe hpyen yen mung shawa langai tsun ai kaw nna chye lu ai.

Awng Lawt mare kaw myen hpyen dap ni nga yang gaw majan gaw matut na mai byin wa ai lam ni nga ai sha n-ga, mare kata bai wa nga na mung shawa ni a matu shimlum lam mung n nga ai nga nna Awng Lawt mare kaw na hpyen hprawng wa ai re lam chye lu ai.

Myen hpyen Dap gaw mung shawa ni hpe majan naw byin ai shara de wa nga mai sai ngu ai lam gaw mung shawa ni hpe majan lapran masha ninggang shatai mayu ai lam re nga nna hpyen masa maram masam nga ai ni tsun ai.

Jinghpaw  Mung Asuya hte Myen Hpyen Dap ni gaw Danai kaw nga ai hpyen yen mung shawa ni hpe Hpyen yen masha ngu ai hku nhkap la ai sha n-ga, hpyen yen dabang hpaw na matu mung ahkang njaw ai lam gaw tinang a mung shawa ni hpe lit nkam la ya ai hte bung ai nga nna Hkristan pawng hpawm hpyen yen garum ningtum hpung komiti malawm Sr. Nhpang Naw Tawng tsun ai kaw na chye lu ai.

Awng Lawt mare na hpyen hprawng wa ai mung shawa ni gaw April shata (11) ya shani kaw na hpyen hprawng wa ai rai nna May (9) ya shani she Danai RCM Hpyen yen Dabang de nkau mi, Myitkyina Jaw Masat Nawku Jawng de nkau mi du shang wa ai hte asak grai kaba sai ni hte lam lapran ma shangai ai kanu num ni gaw nam kata kaw na rawng nga ai lam hpyen hprawng mung shawa ni tsun ai.

UCCPF kaw na mung Myen Asuya hpe  Danai kaw nga ai hpyen yen mung shawa ni a hkamja lam hte malu masha yak hkak ni hpe garum ningtum hpung ni kaw naw garum madi shadaw lu na matu tara shang hpyen yen dabang ni hpe hpaw ya na hte seng ai lawnglam (5) hpe may (14) ya shani hpyi shawn dat sai re.

Leave a Reply

Your email address will not be published. Required fields are marked *