Ginjaw Immigration kaw nna mare buga de masha pru shang gawn hkang tara hpaji hkaw tsun hpawng galaw

Ginjaw Immigration  kaw nna Mung shawa ni masha pru shang gawn hkang tara hpe chye na hkan sa lu na matu mare buga hte Jarit mayan hpyen koi yen dabang ni de hkaw tsun hpawng galaw nga ai lam Ginjaw Immigration Matsun Du Du Kaba Chyinyu La Ring tsun ai kaw na chye lu ai.

Hkaw Tsun hpawng hta Ru Di masha ngu ai, Mungdan masha ngu ai, Maigan masha ngu ai ni hpe tsun sang lang nna Maigan Mungdan masha ni hpe num jaw num ya mai nmai lam ni hte Mungchying sha masat lakmat hte seng ai lam hpe madung ningmu jahpaw hkaw tsun ai lam re hpe chye lu ai.

Hkaw tsun hpawng hpe June 7 ya shani kaw nna Maga Yang, Sha-it Yang, Dum Bung, Nhkawng Pa, Bum Tsit Pa, Lana Zup Ja, Nba Pa mare ni hta nga ai magam gun ni, hpyen koi yen Mung shawa ni, Buga ginra masha ni hpe hkaw tsun ai lam galaw la lu sai re hpe chye lu ai.

Matut nna  Laiza, Mai Ja Yang, Hpung Lum Yang, Je Yang, Woi Chyai, Masat Shadaw (6) hte Masat Shadaw (8) shara ni hta mung hkaw tsun hpawng hpe galaw sa wa na re hpe chye lu ai.

Leave a Reply

Your email address will not be published. Required fields are marked *