Myen Hpyen Dap Kawn Mung Masha Nga Ai Mare Kahtawng De Laknak Kaba Gap Bun Na Lam Tsun Jahkrat

Kamiang Byuha Mu (ေမကစုိးျမင့္ေအာင္) gaw lai wa sai July (2) ya shani hta Hpakant lam Kum Tsai zup mare, hte Lidu lam Kum Tsai yang hkan na mare salang ni hpe shaga hkrum nhtawm mare makau hkan bom ngoi, sinat nsen ni ngoi wa jang Mare kata de laknak kaba ni gap bang na nga nna tsun jahkrit dat ai lam buga masha ni tsun nga ma ai re.

Lai wa sai ten ni hta mung Myen hpyen Dap kawn KIA ginra de htu shadut htim gasat wa ai majaw KIA hpyen hpung ni bai hkap shingla gasat dat ai hta si hkala hkrum ai lam law wa yang n-seng n-ang ai mung masha nga ai mare kahtawng ni de laknak kaba hkrup ma ra gap bang nna mung masha law law si hkala hkrum lai wa sai re hpe na chye lu ai.

Lai wa sai June (28) ya shani hta mung Kuthkai ginwang Man Nyin Um mare kata de Myen hpyen Dap Tat Ma (88) Dap na hpyen hpung ni  kawn laknak kaba (8) lang gap bang ai majaw asak (8) ning re ai Ma Mai Ko Ko si sum mat nna marai (7) hkala hkrum mat ai re, Dai aten TNLA hte Myen hpyen Dap lapran gasat gala  byin ai lam mung nnga dasang mare de gap bang ya ai re nga nna June (29) ya shani hta TNLA hpyen Dap na shi htawn Lithkam Dukaba Tar Aike Kyaw tsun lai wa sai re.

Jinghpaw mung, lahta Sam Mung ginra de htu shadut htim gasat shang wa ai Myen hpyen Dap ni gaw mung masha nga ai mare kahtawng ni hkan hkrup ma ra laknak kaba ni gap bang ai lam, bom ni hkam kau da ai lam, ni a majaw mung shawa law law si hkala hkrum lai wa sai re, 2018 January shata kaw nna May shata laman Jinghpaw mung hte lahta Sam Mung ginra ni hta mung Myen hpyen Dap ni hkrup ma ra bom hkam da ai majaw Mung Masha marai (13) si sum mat nna marai (39) hkala hkrum mat sai re.

Leave a Reply

Your email address will not be published. Required fields are marked *