Mung Hkawng Camp kaw na sat makoi hkrum ai Salang yan a amu hpe Naypyitaw na amu jep hpung ni wa jep joi

Mung Hkawng (KBC) Camp na Salang Hpaugan Yaw hte Salang Dauje Naw San yan sat kau hkrum ai amu hpe Naypyitaw kaw na lung wa ai amu jep joi hpung ni July (9)ya shani kawn wa du jep sagawn nga ai lam Buga Salang langai tsun ai kaw chye lu ai.

Dai jep joi hpung ni gaw Mung Hkawng Uk Su Rung kaw Dai Salang yan nga lai wa sai KBC Camp na Camp Lithkam ni hte Hpung Magam gun ni hpe san sagawn  ai lam galaw ai re hpe chye lu ai.

San jep ai hta sat kau hkrum ai Salang yan hpyen koi yen mung shawa re lam teng nteng hte Myen hpyen la ni sat kau ai re nga nna mung shawa ni tsun ai lam sakse madun lu nlu ni hpe san jep ai nga nna Camp Lithkam tsun ai.

Salang Hpaugan Yaw hte Dauje Naw San gaw lai wa sai January shata (31) ya shani Hka Pra Yang maga de shat mai tam sa ai hta dai shara kaw wa du nga ai Hk.M.Y (602) kata na Myen Hpyen la ni rim woi mat ai hpang sat kau hkrum ai re lam buga masha ni tsun nga ma ai re.

Naypyitaw kaw na amu jep sagawn hpung ni gaw Mung Hkawng Tat Yin na hpyen magam gun ni hte rau July (10) ya shani dai Salang yan hpe sat makoi da ai shara Hka Pra Yang maga de mung wa du jep sagawn ai lam na chye lu ai.

Leave a Reply

Your email address will not be published. Required fields are marked *