Mung Hkawng hpyen yen na Salang (2) sat kau hkrum ai amu hpe jep sagawn nga dingyang

Mung Hkawng hpyen yen dabang  kaw du nga ai Naypyitaw Amu Jep Joi Hpung ni gaw amu byin ai ten na  chye lawm ai sakse marai (2) hte Sat kau hkrum ai Salang Hpaugan Yaw a kanam hpe July (12) ya shani bai san jep nga ai lam chye lu ai.

Amu jep joi hpung ni gaw July (9) ya shani kaw nna July (11) ya shani du hkra Munghkawng kaw jep sagawn ai lam galaw ngut sai rai nna July (12) ya jahpawt Man Je de yu wa ai hpang garai njep la lu ai sakse marai (2) hte Salang Hpaugan Yaw a kanam hpe shaga la nna san jep ai re lam buga masha ni tsun ai.

Dai sakse yen gaw Hka Pra Yang de shat mai sa tam sa ai ten, Myen hpyen la ni kawn shan hpe dai Salang yen a mying tsun nna shan hpe chye nchye hkap san ai shaloi anhte Mung Hkawng na re ngu bai htai ya ai lam nga ai hpe  Buga Salang langai tsun ai.

Jep  Joi hpung ni gaw Sat kau hkrum ai Salang yan hpe gap sat makoi da ai shara hte lup da ai kaw sa htu shaw la ai mare masha ni, lup makoi ai kaw lawm ai ni, nta masha ni, Dabang Lithkam ni hte Hpung magam gun ni hpe langai hpang langai hkum hkrum san jep ai lam galaw ai nga nna Salang yan nga lai wa sai Mung Hkawng KBC Camp lithkam tsun ai.

Ndai Salang yan hpe Myen hpyen ni gaw Majan byin ai shara kaw gap hkra kau ai yan re nga nna Hpyen Dap a tang madun ai hpe Lutdaw kaw hkap la shangut da ai lam nga ai rai tim shan hpe gap sat ai shara gaw majan byin ai shara mung nre, ndum shami gap hkra nna si mat ai mung nre n-gup kaw nan shingte nna da sang gap sat kau ai re hpe Jep sagawn hpung ni sa sagawn la sai re majaw mahtai kaja lu na re nga nna Camp Lithkam tsun ai hpe chye lu ai.

Leave a Reply

Your email address will not be published. Required fields are marked *