Hka De Yawng Mat Ai La Kasha Lahkawng A Moi Mang Hpe Tam Nmu Shi

Man Maw gin wang, Nmawk mare Stone Village na Nan Kya Yi hka shi hta July (28) ya shani hka wa shin ai la kasha lahkawng hka de yawng lawm mat ai lam na chye lu ai.

Man Maw Thar Tsi lawk kaw nga ai  Shadang Htat Thu Ra asak (17) ning, shadang Tu Ja asak (17) ning hte shadang Hein Wana Soe asak (17) ning gaw hka sa shin ai shaloi shadang Tu Ja hte shadang Htat Thu Ra yan gaw hka de yawng lawm mat ai lam na chye lu ai.

Dai shara hta marang ni matut manoi htu ai majaw Hka grai kaba nna hka hpungla ni mung grai ja ai shara re sha n-ga, Laiwa sai ten ni hta mung dai shara kaw Hka Lup si, hka yawng si mat ai lam lang hte lang byin lai wa sai re nga nna buga masha ni tsun ai.

Ya aten dai hka yawng kawn mat ai la kasha lahkawng hpe Man Maw Udang hkyen hpung ni kawn hkan tam nga ai gaw masum ya rai sa raitim nmu shi ai lam na chye lu ai.

Lai wa sai bat laman Man Maw ginra nkau ni hta hka ni kaba nna mahkrai ni daw ai lam, nta ni lim mat ai lam ni mung byin nga ai hpe na chye lu ai.

Leave a Reply

Your email address will not be published. Required fields are marked *