Nam Ya Myen Hpyen Dap ni mare kata nga makam masham hpung woi ni a jahpan hta gahkyin ai lam galaw

Kamaing Nam Ya mare na hpung magam gun ni, Hpung Salang ni a mying jahpan hpe Myen hpyen dap kawn August 2 ya shani sa hta gahkyin la lam Mare Buga hpung magam gun ni kaw na chye lu ai.

Mying jahpan hta ai gaw Mare Uphkang salang ni rai nhtawm hpyen Dap ni a matsun hte jahpan hta ya ai san san re nga nna mare uphkang Salang ni tsun ai.

Jahpan hta ai kaw makam masham hpung shagu na hpung magam gun Sara ni, hpung Salang ni hte Buddha makam masham hpung gyi  ni yawng a jahpan ni hpe hta gahkyin ya ai re hpe chye lu ai.

Hpyen Dap kaw na hpung magam gun ni a jahpan hpe hta ai lam gaw ndai lang shawng nnan lang ngu na rai nhtawm Jahpan hta ai lam hpe atsawm nchye na ai majaw myit ung ang ai lam ni byin ai nga nna hpung magam gun Sara langai tsun ai.

Lai wa sai  shata hta mung Kamaing Byu Ha Myen hpyen Dap ni gaw makam masham hpung sara ni hpe saw shaga nna pyaw pyaw hte rau nga na lam tsun da ai hpang ya na zawn Nawku Hpung magam gun ni a mying jahpan hta wa ai hpe buga masha ni nchye na nga ma ai re

Ya Nam Ya mare baw kaw dung nga ai Myen hpyen dap gaw July shata htum maga de sha bai galai dung ai Myen Hpyen Dap nnan re hpe mung na chye lu ai.

Leave a Reply

Your email address will not be published. Required fields are marked *