Singapore Mungdan kaw galaw ai Karate shing jawng poi hta Jinghpaw Mung na marai (4) Champion lu

Singapore Mungdan kaw galaw ai Invitational Friendship Tournament Singapore 2018 lamang hta Myen Mung a gawn malai sa du shing jawng Jinghpaw Mung na Karate Ginsup Ninghkring marai mali Champion lu la ai lam na chye lu ai.

International Karate Organization Kyokushinkaikan kaw na woi awn galaw ai rai nna, Asia Mungdan (10) a Karate ginsup ninghkring ni shang lawm shing jawng ai lamang hta Myen Mung a gawn malai sa du shang lawm shing jawng ai Jinghpaw Mung na karate ninghkring ni gaw Champion marai (4), Second Prizes lu ai marai (2), Third Prizes lu ai marai (3) re lam Singapore Buga Hpung a Amu Madu Sara Zinghang Gam Htun shana wa ai.

Champion lu ai ni gaw ShdangLa Ja, Shayi San Mai Nu, Shdang Seng Lat Awng, Shyi Seng Nu ni rai nna second prizes lu ai ni gaw Sr. Yaku, Shy. Ja Seng Brim hte thirds prizes lu ai yen gaw Shyi Ja Rung Awng, Shdang Sin Wa Awng  ni re lam na chye lu ai.

Champion lu ai hta na Shd. La ja hte Shyi Seng Nu yen gaw Myitkyina Shwe Zet hpyen yen dabang na rai nna, lahkawng yen kanu kawa nlu mat sai re.

Karete Ginsup Ninghking ni gaw September shata (10) ya shani myen mungdan de bai du wa na rai nna, Yangon Nbungli Daru hta mung sa du hkap tau shagrau ai lamang ni galaw sa wa matu hkyen nga ma ai lam hpyen yen garum ningtum hpung ni tsun nga ai re.

Invitational Friendship Tournament Singapore 2018 shing jawng poi lamang hta myen mung a gawng malai marai (18) sa du shang lawm shing jawng ai hta Jinghpaw Mung na marai (15) , Yangon na marai (2) hte Mandalay na marai (1) sa du shang lawm shing jawng ai re hpe na chye lu ai.

 

Leave a Reply

Your email address will not be published. Required fields are marked *