Laiza Jau Ginwang hta Udang shagrau poi galaw

Laiza Jau ginwang a 17 lang na Udang shagrau poi lamang hpe September 14 ya shani Woi Chyai Udang Bum kaw galaw ai re.

Chyoi pra ai udang shagrau poi akyu hpyi hpawng hte Missa hkungga nawg jau lamang hpe hkying 11:00Am kaw nna galaw ai rai nna akyu hpyi lamang hpe matut manoi galaw sa wa ai hte Kaga ginwang ni kaw na Wa Jau ni mung sa du shanglawm ai lam Sara kaba Lasang Tu San tsun ai kaw na chye lu ai.

Laiza Jau Ginwang a Chyoi pra ai Udang Bum hpe 2002 ning September 14 ya shani Masat hpang ai rai nna Rev. Fr Joseph Nbwi shaman ai hte Hpun Udang hpe jung hpang sai re. 2004 ning hta Ginwang Up, Wa Jau Nbwi Naw woi awn let Congret Udang hpe jun la lu sai rai nna shaning shagu chyoi pra ai Udang shagrau poi lamang hpe galaw nga ai re hpe chye lu ai.

17 lang na Laiza Jau Ginwang Chyoi pra ai Udang shagrau poi hta ginwang kata na magam gun ni, Pajau, Je Yang, Hpunlum Yang hpyen yen dabang hkan na Hkahtawlik hpung masha ni hte kaga nawku hpung na hpunau hpung masha ni yawng marai hkying 4 jan sa du shanglawm ai hte wu wu di di galaw la lu sai lam chye lu ai.

Leave a Reply

Your email address will not be published. Required fields are marked *