Mali, Nmai Zup Hka madim dawm jahkring da ai 7 ning hpring akyu hpyi hpawng galaw na hkyen nga

Mali, Nmai hka madim hpe lai wa sai 2011 ning Myen Mung Gumsan Magam U Tieng Sien Lakhtak hta Mung masha ni laja lana ninghkap ai majaw dawm jahkring da ai rai nna du na October shata (1) ya shani Tang Hpre mare kaw Mali, Nmai hka madim dawm jahkring ai (7) ning hpring akyu hpyi hpawng lamang galaw sa wa na re majaw Nu Wa Mungchying sha ni yawng sa du shanglawm na matu lamang shabyin shatai komiti ni saw shaga da ma ai re hpe chye lu ai.

Hka madim masing a majaw htawt sit hkawm ra mat ai Mali Yang hte Tang Hpre buga masha ni kawn ya ten tam lu tam sha lam ni yakhkak jam jau nga ai ai re hte Myen Mung Asuya hte Miwa company ni kaw nna htawt sit ra mat ai mare masha ni hpe gaw gap da ya ai hpunpyen nta ni mung hpunpyen hkalung hte gaw gap da ya ai re majaw tsam mat ai hte marang mung gayun ai lam Nhkum Ja Hkawn tsun shana wa ai.

Miwa company ni kawn htawt sit ra mat ai mare masha ni hpe ya aten hka madim bai lu galaw na matu asawng zinlum hkawm nga ma ai raitim ndai hka madim hpe tsep kawp dawm jahkring kau lu hkra Mung shawa ni matut ninghkap sa wa na re nga nna ginra masha ni tsun nga ma ai re hpe chye lu ai.

Leave a Reply

Your email address will not be published. Required fields are marked *