Myen hpyen ni rim da ai Salang yan hpe (3) lang ngu na rung shapraw

Myen Hpyen Dap Dap Nu (33) ki kawn tara shawk shawn da ai majaw tara rung dung nga ai Salang Hpauyam La Sam hte Salang Lahpyaw Hkawng Dau yan a mu hpe October (17) ya shani Myitkyina Tara Rung kaw (3) lang ngu na tara rung shapraw san jep ai lam galaw ai hpe shan yan a nta masha ni kaw na chye lu ai.

“Tara rung shapraw ai daini hte rai yang (3) lang du nga sai raitim, (3) lang tup san jep ai lam n galaw shi ai  rung shapraw ai san san sha naw rai nga ai” nga nna Salang Lahpyaw Hkawng Dau a kawa tsun ai hpe chye lu ai.

Tara shawk shawn da ai gaw Myen Hpyen Dap Dap Nu (33) kata Hk.L.Y (21) kaw na ဗိုလ္ၾကီးေဇာ္မ်ိဳးႏိုင္ kawn shan hpe KIA hte matut mahkai ai yan re ngu nna Pukma 17/1 hte tara shawk shawn da ai re. Ndai tara shawk shawn da ai maga na sakse ni hpe san jep lu ai hpang she ndai amu hpe gara hku galaw sa na chye lu na re nga nna ndai amu hpe hkan garum ai Shingnip Tara Kasa Hpung kaw na Tara Kasa Hkun Nawng tsun ai lam nga ai.

Ndai Salang yan gaw Hpakant Ginwang, Loi Seng mare na Salang Lahpyaw Hkawng Dau hte Kahtan Yang na Salang Hpauyam La Sam yan re. Ndai Salang yan hpe lai wa sai September praw (5) ya jahpawt myi garai nmu shi ai aten hta shan a dum nta kaw na Myen hpyen ni rim woi mat ai re hpe chye lu ai.

Leave a Reply

Your email address will not be published. Required fields are marked *