Kani Nanghpam Pat Jasan Bungli Hpe Mungshawa Ni Madi Shadaw Ai Lam Naw Gawngkya Nga

Kani Nanghpam Pat Jasan magam bungli hpe Kaga hpu-nau ni hta Anhte Wunpawng ni gaw madi shadaw ai lam, chye na ai lam naw ningra ai nga nna, Hpakant Ginra kaw Pat Jasan bungli galaw nga ai Komiti Slg ni tsun ai kaw na chye lu ai.

“Pat Jasan bungli shang ai hpang shawoi shaning na hta Kani lusha ai masha ni yawm wa ai raitim Pat Jasan magam bungli hpe madi shadaw ai lam hta gaw gawng kya wa ai” nga nna Maw Mau Bum Kani Nanghpam Pat Jasan Komiti Ningbaw wa tsun ai.

Shiga na ai hta hkan nna Pat Jasan Bungli shang ai lam hpe jahkring hkring galaw nga ai hta October 16ya hte 17 ya (2)ya tup Mawmau bum hte Nba La Hka makau mayan kaw pat jasan bungli shang yang Kani lusha ai masha marai (12) hpe lu rim ai lam Mawmau Bum Kani Nanghpam Pat Jasan Komiti kaw na chye lu ai.

Dai lu rim ai marai (12) hta na marai (8) hpe kanu kawa ni sa hkam ai majaw ga sadi jaw nna dat dat sai lam hte, ngam ai marai (4) gaw shanhte hkum nan dawn jasan hkam la na hpyi shawn ai majaw Ma Sa Kani Nanghpam Dawn Jasan Dabang de sa dat sai lam hpe mung chye lu ai.

Kani Nanghpam hpyen hkoi tsai mat na matu Wunpawng myusha Kani Nanghpam Pat Jasan Komiti kaw nna mung Kani nanghpam lusha ai ni hpang de sa du hkrum shaga ningmu jahpaw ai lam ni galaw sa wa na masing ngaai lam ni nga ai re hpe mung chye lu ai.

Leave a Reply

Your email address will not be published. Required fields are marked *