Sara Saranum Marai (3) Hpe Htawng Dam Jahkrat

Jinghpaw Mung kata na hpyen yen mung masha ni lawt pru wa lu na matu simsa ai ladat hte n-gun madun woi awn ai Sara/Saranum marai 3 hpe December 7 ya shani tara rung kawn htawng dam shata 6 hte gumhpraw dam kyet sen 5 hte tara amying jahkrat sai lam na chye lu ai ai.

Sara /Saranum marai 3 hpe Myen mung asuya kawn gumhpraw Kyet  sen 5 n jaw yang htawng dam laning mi jahkrat na re ngu jahkrit shama ai lam nga ai, ya na zawn tara dawdan ai a ntsa Myen mung na tara Upadi hpe gaw hpa n tsun mayu sai lam, tara kasa ni hku nna matut galaw sa wa na re lam tara kasa Doi Bu kawn ya na zawn tsun ai.

” Ndai hpe maram ai tara agyi ni hpe sha tsun matu ai hku re, Upade Pukma kaw lawm ai mung Gumhpraw Dam Shing nrai Htawng Dam raitim jahkrat na re , raitim ndai 2 masat ai gaw shanhte na jahkrit ai lam re mu mada ai,anhte gaw ahkaw ahkang nga ai lahta rung tsang hte tsang lung na re”

ya na zawn tara sak se ni ga shaga na aten n jaw ai, balik ni gaw mungdan sari ahtu hkra shangun ai ngu Upade hte rim woi mat wa ai lam re, sak se ni mung nga ra ai, shawk shawn na ahkang mung n jaw ai gaw ntara ai lam re nga nna Dr Hkalam Sam Sun kawn shi a ningmu hpe ya na zawn tsun dan ai.

dai gaw tsep kawp n tara ai tara dawdan lam langai re,bai chyawm jahkrup yu myit yu rai nna Hkaw ahkang madu ni hte bai matut nna galaw sa wa ra ai baw rai nga

Myen mung a tara Upade gaw grai naw gram ra ai, ginra shagu hta ndai zawn manghkang ni byin nga ai nga nna Kachin mung masa party Dr Manam Tu Ja kawn mung ningmu hpe tsun  ai.

ya anhte yawng na taw nga ai jinghpaw mung kaw tara runghta mung grai shamu taw nga ai, Dai re majaw Myen mung na tara Upade ndai gaw grai naw garam ra ai, ra rawng ai lam grai naw nga ai ngu mu mada ai”

Ndai gaw mung shawa ni hpe roi ai tara Upade re,Mung chying masha ni a asak hpe Mungdan Asuya kawn makawp maga na lit nga ai. Mung shawa ni hpe woi awn ai makawp maga nga ai hkye la ai ni hpe Htawng dam/ Gumhpraw dam jahkrat ai gaw n tara ai re nga nna tara aming jahkrat hkrum ai Sara Lum Zawn tsun ai.

” Ndai Asuya a ntsa gara hku kam ging na, gara hku simsa lam gawgap na ndai zawn anhte htawng hkrak ai gaw anhte gaw mara tawt lai  ai nre mung shawa ni a asak hkye ai re, Dingdung daw hpyen dap daju kawn tara aming jahkrat ai”

Sara Lum Zawng, Sara Zau Jat hte Srn Nang Pu ni gaw lai wa sai September 3 ya shani kaw nna mungdan sari ahtu hkra shangun ai mara amu Pukma 500 hte Myen Hpyen Dap Kawn tara shawk shawn da ai rai nna December 7 ya shani tara rung kawn tara aming jahkrat dat sai re,  ya na zawn tara rung kawn n tara ai hku nna amu dawdan ai a ntsa Mung shawa law law gaw Myen Mung Asuya tara Upade hpe myit htum myit daw nga ai lam shi sawk kareng htoi san tang madun da ai.

Leave a Reply

Your email address will not be published. Required fields are marked *