Myen Hpyen Dap Ni Hkrup Mara Laknak Gap Bun Ai Majaw Mung Shawa Hkala Hkrum

Kuthkai Ginwang kata TNLA hte Myen Hpyen Dap ni December (7) ya jahpawt daw kaw nna matut manoi gasat gala majan byin ai hta Myen hpyen Dap ni mung mare masha ni nga ai Mare Kahtawng ni de laknak kaba hkrup mara gap bun ai majaw Mungne mare na miwa amyu sha marai (4) myawk si hkra hkala sawng ai lam na chye lu ai.

TNLA hpyen hpung ni kawn December (7) ya shana hkying (9:00) Pm daram hta Mungne kaw dap jung shara jahkrat nga ai Myen Hpyen dap Hk.L.Y (290) hpe sa htim gap ai hpang Myen hpyen dap ni kawn hkrup mara laknak kaba gaw shadam dat ai majaw Mungne mare Be- Hwa-Chyai daw lawk 2 kaw laknak kaba si wa hkrat kapaw nna Miwa La marai (2) hte Miwa Num marai (2) hkala hkrum mat ai lam na chye lu ai.

Dai shani hta sha Kuthkai ginwang kata Myen hpyen Dap Hk.L.y (241) kawn gap dat laknak kaba si langai mung Kuthkai mare lawk (5) na Jan. Aye Shwe a nta kaw wa hkrat ang ai raitim n kapaw ai hpe Myen hpyen Dap ni kawn dai laknak kaba si wa zingla kau ai lam na chye lu ai.

December (7) ya jahpawt manap hkying (6:30) Am daram hta Na Num mare dingsa kaw shara jahkrat nga ai TNLA, MNDAA pawng hpawm hpyen hpung ni hpe myen hpyen dap Hk.M.Y (218) Hk.L.Y (290) dap na pawnghpawm hpyen hpung ni sa htim gap ai kawn gasat gala majan  matut manoi byin wa ai rai nna gasat gala majan byin ai shara maga de Myen hpyen Dap Hk.L.y (123) na hpyen hpung ni laknak kaba gap garum ai lam, shana daw hkying (3:00)Pm daram hta gaw Kuthkai mare makau kaw shara jahkrat nga ai Ts.K.Hk (16) kata na Hk.L.Y (241,242) pawng hpawm hpyen hpung ni hpe TNLA hpyen hpung ni sa htim gap ai kawn gasat gala majan byin ai lam na chye lu ai.

 

 

Leave a Reply

Your email address will not be published. Required fields are marked *