Rahkai Hpyen Dap AA Ni Kawn Myen Asuya Balik Dap hpe Htim Gasat

Rahkai Amyu sha laknak lang rawt malan uhpung AA hpyen Dap kawn Jan. 4 ya shani Rahkai mung na Myen Asuya Balik Dap shara 4 hpe htim gasat ai lam na chye lu ai.

Myen hpyen dap gaw Rahkai hpyen dap ni shamu shamawt nga ai shawng lawm ginra de htu shadut shang wa ai sha n-ga, hpyen nbung li, laknak kaba ni hte, balik ni mung shang lawm let, laja lana htu shadut lung wa ai gaw shata 2 hkawt rai wa sai lam, Rahkai mung hta lai nna kaga mungdaw ni hta Myen Hpyen Dap kawn shata 4 daram hpyen shamu shamawt jahkring da nna, Rahkai hpyen dap hpe sha laja lana htu shadut htim gasat ai lam gaw daini du hkra galaw nga dingyang re majaw Rahkai mung kata hpyen majan shara shagu gasat gala majan byin wa ai re lam AA shiga lawk kaw na chye lu ai.

Jan 4 ya jahpawt hkying 6 aten daram hta Pan Zi, Jawng Tawng, Jun Bauk hte Kahtila kaw dung ai  Myen Asuya balik  Dap 4 hpe AA hpyen dap kawn sa htim gasat ai re, Rahkai mung kata Myen Balik Dap ni hku nna, mung shawa ni, Rahkai Ramma ni hpe ntara ai hku rim hkang zing da ai lam, lam amyu myu hku jahkrit shama htawng rim bang ai lam, balik magam bungli hpe n galaw ai sha, Myen Hpyen Dap hte pawng nna majan shang lawm ai lam ni nga ai majaw tsun sadi jaw da lai wa sai re raitim, grau grau shanawng wa ai majaw ya na zawn htim gasat wa ai re lam Rahkai hpyen Dap kawn tsun da ai re.

January 4 ya shani byin ai gasat gala majan hta Myen Hpyen Dap  ni kawn hpyen nbungli hte jahkring hkring sa gap gasat ai majaw ginra masha ni hkra hkala hkrum ai lam nga ai re, Myen hpyen Dap hku nna htu shadut

ai lam n jahkring ai rai yang Rahkai hpyen dap kawn  ninghkap gasat sa wa ra na re lam Jan 1 ya shani AA hpyen Dap tsun ndau da lai wa sai re hpe na chye lu ai.

Jan 4 ya shani byin ai gasat gala  majan hta Myen Asuya balik magam gun marai 14 hpe rim la lu ai rai nna, Hpyen bawng yawng hpe mungkan tara htung lai hte maren hparan sai lam AA hpyen Dap kawn tsun da ai re. Rahkai mung ginra hta lai wa sai 2018 December  shata daram kaw nna AA hte Myen Hpyen Dap lapran majan laja lana byin wa ai majaw mung shawa marai 4000 a lahta hpyen yen tsin yam hkrum nga ai re hpe chye lu ai.

Leave a Reply

Your email address will not be published. Required fields are marked *