Bangladesh Mungdan, Daka kaw galaw ai shi sanglang hpawng hta Ms. Yanghee Lee kawn Mali Nmai hka madim hte seng nna tsun shalawm

UN kawn Myen Mung shinggyim ahkaw ahkang hte seng nna sawk sagawn na matu laksan lit shatsam da hkrum ai Ms. Yanghee Lee gaw Bangladesh Mungdan, Daka kaw January 25 ya shani shi sanglang hpawng galaw ai lam chye lu ai.

Shi sanglang hpawng hta Ms. Yanghee Lee kawn Mali Nmai hka madim bai galaw sa wa na hte seng nna ginra masha ni a shinggyim ahkaw ahkang hkrat sum lam hte, shingra hpyen hpe hkrit tsang ra ai lam ni nga wa ai majaw Mali Nmai hka madim galaw n galaw hte seng nna Myen Mung Asuya kawn Mung shawa hpe  asan sha tsun sanglang dan ra ai lam tsun da ai hpe chye lu ai.

Rahkai Mung, Maung Taw ginra hkan nga ai Rohinjar amyu sha ni a dum n ta ni hpe Myen Mung shimlam Balik Dap hte Buddha makam masham n chyun shanang hpung ni pawnghpawm nna wan nat kau ya ai sumla hkrung ni hpe mu ai, ndai zawn re lam ni gaw amyu kaba lailen lang nna dip sha ai re sha n-ga Rohinjar amyu sha ni hpe Bangladesh Mungdan de hprawng shang wa hkra galaw ai lam re, Myen Asuya kawn Rahkai amyu sha laknak lang rawt malan hpung (AA) hpe ARSA kasu kabrawng hpung hte gindun ai nga nna tsun wa ai gaw Myit gyip gyeng ai, lit nla ai lam re hte Myen Mung a Democracy rawt jat galai shai wa ai lam hpe ding bai dingna jaw ai lam re nga tsun da ai.

Myen Mung Asuya hte Hpyen Dap gaw Myen Mung kata na shisawk ni hpe lam amyu myu hku jahkrit shama rim ahkyak la ai lam ni galaw nga ding yang re majaw Myen Mung a lam hte seng nna jaw teng ai mabyin lawng lam ni hpe n dut n dang tsun shaga lu na matu grai yak nga ai lam tsun da ai re.

Myen Mung kata ru di amyu sha ni hpe amyu shamyit lai len lang nna dip up sha nga ai Myen hpyen dap ningbaw Min Aung Hlaing hpe mung rim ahkyak la ra ai lam Ms.Yanghee Lee kawn tsun madi madun da ai. Majan a majaw hpyen yen tsin yam hkrum sha nga ai Jinghpaw Mung, Sammung, Rahkai Mung ginra na hpyen yen Mung shawa ni hpe garum madi shadaw ra lam ni grai naw ra nga ai lam ni hpe shi sang lang hpawng hta tsun ai re hpe na chye lu ai.

Leave a Reply

Your email address will not be published. Required fields are marked *