Manje Buga kaw Lungseng Udang hpaw akyu hpyi poi lamang galaw

Manmaw Ginwang, Manje buga, Kawa bum kaw galaw ngut kre la lu sai Lungseng Udang hpe February 1 ya shani hpaw akyu hpyi poi lamang galaw ai lam chye lu ai.

Manje mare makau na Kawa Bum hta galaw da ai Lungseng Udang hpe Manje buga hpung Kongsi kawn woi awn n-htawm galaw shangut la lu sai majaw Lungseng Udang kyi hpyi dingshawn poi galaw ai re. Lamang hta KBC Amu madu Rev. Hpauyawng Tu Mai hte KBC Ningbaw kaba Rev. Dr. Hkalam Samson yan kawn chyum laika sharin ya ai hte Manje buga hkalup hpung a hpung lawk shagu na hpung masha ni mung February 1 ya shana de Sara kaba yan hpe magun lit gun jaw ai re hpe chye lu ai.

Shawng de Manje buga hpung ni kyu hpyi bum nlu ai re majaw Kawa Bum hpe kyu hpyi bum galaw na matu masat la nna hpung a kanu kawa ni kawn Lungseng Udang galaw na lam jawm myit mang let galaw hpang wa ai hte ngut kre la lu sai majaw karai kasang hpe chyeju shakawn ai nga nna Salang Zau Hkam tsun dan ai.

Manje buga hpung hta hpung hting gaw (1000) daram nga ai re n-dai hpawng lamang hpe February 1-2 shani lahkawng ya galaw sa wa na rai nna Lungseng Udang kyu hpyi ding shawn hpaw poi lamang hta masha marai (1000) daram sa du shang lawm ai re hpe chye lu ai.

Leave a Reply

Your email address will not be published. Required fields are marked *