Jinghpaw Mungdaw kata na hpyen yen masa lam hte seng nna UNHCR dat kasa hte hkrumzup bawngban

Jinghpaw Mungdaw kata nga ai hpyen yen Mung shawa ni a masa lam ni hpe UNHCR kawn gara hku garum madi shadaw lu na lam hte seng nna Asia ginra hte seng ai UNHCR Hpyen yen lakawn lanawn dat kasa salang Mr. Johan Cels hte Munghpawm Rapdaw dat kasa Saranum Maran Ja Seng Hkawn February praw 1 ya shani hkrum zup bawngban ai re hpe chye lu ai.

“Lai wa sai ten hta Munghpawm Rapdaw dat kasa hku nna Jinghpaw Mung kata nga ai hpyen yen ni a masa lam ni hpe UNHCR de tang madun ai lam ni nga lai wa sai re. UNHCR magam gun ni mung hpyen yen dabang ni hkan sa du gawan hkawm yu ai hta tang madun ai lawnglam ni hte bung pre ai majaw hpyen yen ni a mayak hpe loi li garum madi shadaw lu na matu yaw shada let sa du hkrum bawngban ai lam re” nga nna Saranum Maran Ja Seng Hkawn tsun ai.

Hpyen yen ladaw aten galu a matu myit yaw shada let hpyen yen nga ai ni a hkai lu hkai sha lam masing hpe madung tawn tsun jahkrup ai lam, ndai magam bungli hpe ta tut hkrang shapraw na matu gaw shanhte hkrai nmai ai, yawng shanglawm ai ladat hte galaw na matu re nga nna Saranum matut tsun dan ai.

Asia hte seng ai UNHCR hpyen yen lakawn lanawn dat kasa Salang gaw hpyen yen ni a lam hte seng nna lit nga ai Asuya hpang de mung tang madun nna ta tut hkrang shapraw lu hkra shakut sa wa na matu tsun ai lam ni mung nga ai re. Ya na zawn UNHCR na hpyen yen hte seng ai salang wa Jinghpaw Mung de sa du ai gaw ndai lang shanwg nnan lang re hpe chye lu ai.

Leave a Reply

Your email address will not be published. Required fields are marked *