Mung shawa myit ra n-lawm ai sha ဗိုလ္ခ်ဳပ္ေအာင္ဆန္း a hkrang bung sumla n-shadun na matu Kachin ramma ni ndau laika shapraw

Kaya Mung hta ဗိုလ္ခ်ဳပ္ေအာင္ဆန္း a hkrang bung magri sumla galaw tawn da na hpe n ra sharawng ai majaw ning hkap n-gun madun ai Kaya ramma ni hpe Asuya kaw nna rim ahkyak la da ai a n-tsa Kachin ramma uhpung uhpawng ni kawn February 2 ya shani Kaya Mung Asuya hpang de n-ra sharawng ning hkap ai lam ndau laika shapraw da ai re.

Kaya Mung Asuya gaw Mung shawa yawng hte seng ai nam pan sun wang kaw ဗိုလ္ခ်ဳပ္ေအာင္ဆန္း a hkrang bung sumla hpe January 31 ya shani sa shadun tawn dat ai majaw Kaya ramma ni ning hkap n-gun madun wa ai hpang ramma law law hpe rim ahkyak la hkrum ai re.

Kaya Mung kaw ဗိုလ္ခ်ဳပ္ေအာင္ဆန္း a hkrang bung sumla hpe galaw tawn na malai ဗိုလ္ခ်ဳပ္ေအာင္ဆန္း jaw tawn da ai ga sadi ni hpe mahtang hkrang shapraw ya na matu hpyi shawn ai Kaya ramma ni hpe Asuya kawn tara shawk shawn da lai wa sai re. February 1 ya shani ဗိုလ္ခ်ဳပ္ေအာင္ဆန္း a hkrang bung sumla sa shadun da ai hpe ning hkap n-gun madun ai Kaya ramma ni hpe mung tara bai shawk shawn da ai a n-tsa Kachin ramma uhpung uhpawng ni rai nga ai JLH Federation, Kachin National Youth Network, All Kachin Youth Union, Youth Rescue ni kawn ning hkap ndau laika shapraw wa ai re.

Ya na zawn Kaya ramma ni ning hkap n-gun madun ai gaw tinang a ahkaw ahkang hpe htawng madun ai lam re majaw kaja ai lam re ngu mu mada ai. Asuya ngu ai gaw Mung shawa ni lata da ai re majaw Mung shawa n-sen hpe madat ra na re nga nna All Kachin Youth Union na Saranum Seng Nu Pan tsun ai.

Simsa lam hpe gaw de nga ai ten hta ru di amyu sha ni a myit hkam sha lam hpe ahkyak n tawn ai gaw Mungdan a matu kaja ai mahtai ni byin pru wa lu na n re nga nna Kaya ramma uhpung uhpawng na ကိုဒီးဒီ tsun ai.

ဗိုလ္ခ်ဳပ္ေအာင္ဆန္း a hkrang bung magri sumla hpe tawn mayu ai rai yang Mung shawa hpe atsawm tsun dan nna myit ra hpe shawng la ra na re. Ya na zawn galaw ai gaw gum shem ai lai ladat hpe lang ai re nga nna Kaya ramma ခြန္းေသာမတ္စ္ tsun mung tsun ai.

Kaya Mung Asuya Hkringmang  ဦးအယ္လ္ေဖာင္းရွိ gaw ဗိုလ္ခ်ဳပ္ေအာင္ဆန္း a hkrang bung sumla hpe Mung shawa myit ra n-lawm ai sha galaw na n-re nga nna Mung masa party ni, rudi amyu sha laili laika hte htunghkying uhpung uhpawng ni, rudi amyu sha laknak lang rawt malan hpung ni hte shiga media ni a man hta tsun sadi jaw da lai wa ai rai tim ya na zawn ga sadi run ai gaw rudi amyu sha ni a  myit ra hpe n hkung ga ai lam re nga nna Kaya amyu sha uhpung uhpawng ni kawn January 1 ya shani gindun ndau laika shapraw lai wa sai re.

February 1 ya shani Kaya Mung hta ဗိုလ္ခ်ဳပ္ေအာင္ဆန္း a hkrang bung magri sumla galaw tawn ai hpe dawm kau ya na matu Kaya Mung ramma ni kawn Mungdan Gumsan Magam hpang de laika tang ai rai nna n-gun madun ai ramma ni hpe tara shawk shawn ai lam ni dawm kau ya na matu mung ကယားလီဖု ramma ni hpyi shawn nga ai re.

Leave a Reply

Your email address will not be published. Required fields are marked *