Na Ga amyu sha laknak lang rawt malan hpung uphkang ginra de Myen Hpyen Dap ni htu shadut shang wa

Sagaing Ginwang hte Jinghpawng Mung jarit mayan na NSCN-K hpung ni shara jahkrat nga ai Da Ka ngu ai Na Ga Amyu sha ni a ginjaw ginra de January 29 ya shani kaw nna Myen Hpyen Dap n-gun 400 daram shamu shawt shang wa ai majaw Na Ga Amyu sha laknak lang rawt malan hpung ni shara yen kau da ra ai lam nga ai hpe na chye lu ai.

Ya na zawn Myen Hpyen Dap ni  jarit tawt lai wa ai lam gaw India Asuya a hpyi shawn ai lam mung re nga nna mung na chye lu ai lam  NSCN-K na tsun ahkang lu ai Salang langai tsun da ai. Myen Asuya ni  shamu shamawt shang wa  ai lam hte seng nna NSCN-K gaw jarit tawt lai ai lam hpe lawan dawm kau ya na matu Na Ga Amyu sha ni hpe tsawra matsan dum nna Myen Hpyen Dap kawn hpyen shamu shamawt lam n galaw na matu  Myen Hpyen Dap Dap Up Daju hte Myen Mung Hpaji Jaw Salang hpang de laika mara  hpyi shawn ai lam mung nga ai re hpe na  chye lu ai.

Ndai lam hte seng nna Myen Hpyen Dap gaw Na Ga ginra de shimlam a matu hpyen shamu shamawt ai lam nga ai, India Hpyen Dap hte mung shada mahku mara, matut mahkai  lam nga ai nga nna tsun da ai re. Ya na zawn Myen Hpyen Dap ni jarit tawt lai shang wa ai lam ni galaw wa ai majaw Na Ga Amyu sha laknak lang rawt malan hpung ni gaw majan byin wa na hpe mung myit tsang nga ma ai re. NSCN-K Na Ga amyu sha laknak lang rawt malan hpung gaw Myen Asuya hte 2012 shaning  hta gap hkat jahkring ta masat htu da ngut sai hpung re hpe mung chye lu ai.

 

Leave a Reply

Your email address will not be published. Required fields are marked *