Mali Nmai Zup Hka Madim masing hpe ninghkap n-gun madun lamang galaw

Mali Nmai Zup Hka Madim masing hpe dawm jahkring ya na matu Wunpawng Uhpung Uhpawng ni, makam masha nawku hpung ni hte Amyu Bawsang yawng shanglawm ai hte February 7 ya shani Myitkyina Shatapru Manau wang kaw shawa n-gun madun lamang galaw ai lam chye lu ai.
Shawa n-gun madun lamang hpe jahpawt hkying 9:00Am kaw nna lam hkawm n-gun madun mahtawm Myitkyina Myo Gat kaba du hkra hkawm ai re. Myo kata shing grup n-gun madun ai hpang hkying 12:30Pm hta Manau wang de bai du wa ai, n-gun madun lamang a matu tara shang laika tang shawn ai raitim Asuya kawn shanhte nra sharawng ai ni lawm ai, ျငိမ္းစုစီ Pukma kaw nlawm ai ni mung galaw ai nga nna tsun ai lam, ndai manghkang hpe Asuya ni mung Mungdan masha ni re majaw atsawm sha tsun jahkrup yang gaw manhgkang grai wa gaw n kaba na re ngu kam ai, lama na Asuya kawn ahkyak la wa ai raitim Myu hte Mungdan a matu galaw ai re majaw Asuya kawn jahkrat ai dam ari hpe mung hkam la na lam MRJ na Saranum Nhkum Ja Hkawn matut tsun ai.
Mungdan masha ni Hka Madim masing hpe nra sharawng ninghkap ai majaw Asuya ni hku nna mung Mung shawa ni a myit ra sha re ngu tsun da lai wa sai re majaw mung shawa ni mung kam let shakut ga, ndai masing hte seng nna Asuya salang ni mung myit nga na re ngu kam ai nga nna matut tsun ai.
Ndai Hka Madim masing hte seng nna Jinghpaw Mung sha n-ga Myen Mung kata nga ai mung shawa ni yawng jawm ninghkap sa wa na matu tsun nga ai re. Lai wa sai ten tinang a buga ginra ni hta ninghkap ai lam lang hte lang galaw ai raitim ndai zawn Jinghpaw Mung ting na Mung shawa ni jawm ninghkap n-gun madun ai gaw shawng nnan lang galaw ai rai nna masha yawng 6000 jan shanglawm ai re hpe chye lu ai.

Leave a Reply

Your email address will not be published. Required fields are marked *