Man Wing mare na Ma marai 6 bawm kapaw hkala

Man Wing mare lawk 7 kaw na asak 12-16 lapran na Ma marai 6 gaw March 5 ya jahpawt bawm kapaw hkala hkrum ai lam na chye lu ai.

Ndai Ma ni gaw mare shinggan, hkauna pa de Nga rem sa ai hta Ga ganaw da ai makau kaw na bawm mu hta la nna gasup gabai rim chyai ai kaw tat jahkrat dat ai majaw kapaw wa ai re nga nna Man Wing mare Salang La Nu tsun ai hpe chye lu ai.

Hkala hkrum ai Ma ni gaw Nhkum San Awng, Maru Seng Myu Awng, Pausang Jat Seng Naw, Nhkum Sut Ring Awng, Nhkum Nan Nan hte Nhkum Mun Tsawm Pan ni re. Hkala hkrum ai 6 hta na marai 3 gaw nau n sawng ai majaw ya ten tsi rung kaw na pru sai rai tim ngam ai marai 3 gaw hkala sawng ai re hpe chye lu ai. Sawng ai 3 kaw na marai langai gaw Kan kaw hkra ai re majaw Mandalay tsi rung kaba de shalai na re. Ndai mabyin hte seng nna kadai uhpung ni kaw na mung lit la hparan ya ai lam nnga shi ai hpe chye lu ai.

Man Wing mare kaw NGO ni kawn bawm hte seng ai ningmu jahpaw hkaw tsun ai lam ni gaw nga ai rai tim hpyen yen dabang hkan sha madung hkaw tsun ai re majaw mare na Ma ni bawm hte seng ai lam hpa n chye na byin ai lam re. Ginra masa hta hkan nna bawm hte seng ai lam ni hpe mare kata ningmu jahpaw hpaji jaw hkaw tsun ai lam ni grai naw ra ai nga nna Man Wing mare na Sara Zau Bawk tsun ai.

Leave a Reply

Your email address will not be published. Required fields are marked *