Putao ginwang Nbu Baw mare kaw htunghking Manau wang galaw na

Putao ginwang Nbu Baw mare kaw Machang Baw htunghking hpung kawn woi awn nhtawm Wunpawng htunghking Manau shadung jun na matu galaw nga ai lam na chye lu ai.

Mali Hku Majoi ginra hta masat dingsat hku nna Wunpawng amyu sha htunghkying manau shadung hpe galaw ra ai ngu ai masing kata Nbu Baw mare masha ni hte jahkrup nna Wunpawng htunghking manau wang masat nhtawm manau shadung jun na matu galaw wa ai re nga nna Machang Baw htunghking hpung ningbaw Sara Gum Nga Naw Awng Tsun ai.

Ndai htunghking manau wang a matu Mung mare masha ni kawn lamu ga Eka 120 alu jaw ya ai re. Raitim manau wang shatai na shara gaw Eka 20 sha jai lang na lam shiga pru wa ai majaw alu jaw ya ai lamu ga madu ni hte woi awn galaw nga ai ni a lapran nchye na hkat ai manghkang ni byin wa ai re hpe na chye lu ai.

Htunghking Manau Wang a matu Eka 120 ngu masat da ai raitim Asuya a lamu ga Upadi hku shai wa ai lam ni nga ai majaw Eka 20 daram hpe sha Manau wang shatai nna ngam ai lamu ga hpe gaw Manau wang sin ai ni a matu hte buga ginra masha ni rem lu rem sha shara shatai na matu ngu yaw shada nna galaw ai re. Ndai lam hpe Mung shawa nkau ni gaw chye na shut nna alu jaw da ai lamu ga hpe manau wang a matu Eka 20 sha masat ai, ngam ai hpe tinggyeng hku  masat la yang lamu ga nkam jaw sai nga nna shiga amyu myu pru wa ai lam Jinghpaw Mungdaw Rapdaw Salang Sumdu Naw Awng tsun ai hpe chye lu ai.

Nbu Baw htunghking manau wang a matu Machang Baw Ninghtawn na Mung shawa ni lamu ga jaw ya ai hte Jinghpaw Mungdaw Rapdaw Salang Sumdu Naw Awng kaw nna ra mara madi shadaw galaw ya nga ai re. Ndai htunghking manau wang a matu Jinghpaw Mung Asuya de Eka 20 ngu nna tang da ai hpe ahkang n hkrat shi ai majaw tatut masing n hpang lu shi ai lam shabyin shatai Komiti ni tsun ai hpe chye lu ai.

Leave a Reply

Your email address will not be published. Required fields are marked *