Salang Yang hpyen yen dabang kaw sin laru byin wa ai majaw dum nta nkau ni daw hten mat

Putao Ginwang kata na Salang Yang hpyen yen dabang kaw March 16 ya shana daw hkying 5:00Pm – 6:00Pm lapran hta Nbung laru hte Sin marang ni laja lana htu wa majaw hpyen yen Mung shawa ni  a dum nta 5 hten agrawp mat ai lam Maling Chyangau shana wa ai kaw na chye lu ai.

“Salang Yang hpyen yen dabang hta shawng de ndai zawn laja lana nbung ndu ga ai, ndai nbung laru gaw sawng dik ai re. Ya aten hpyen yen Mung shawa ni a nta yawng ngu na daram gaw n yawt mat ai, dum nta hten hkrum ai hte seng nna gara hku galaw sa wa na ngu ai hpe dabang komiti ni naw jahkrup  nga ai” nga nna Sara Nbau Hkun La tsun ai.

Nta hten Arawp mat ai hpyen yen Mung masha ni gaw ya ten mai byin ai hku shanu nga ai rai nna kaga malu  masha yak hkak ai hta ya aten dum nta gaw gap lam hkyak hkyak ra kadawn nga ai hpe na chye lu ai.

Salang Yang hpyen yen dabang hta shanu nga ai hpyen yen Mung shawa ni gaw 2015 August shata kaw na Myen Hpyen Dap hte KIA byin ai Mali Yang majan a majaw  Ja Ra Yang mare masha ni san san hprawng yen nga ai hpyen yen dabang re hte ya aten hpyen yen htinggaw 64 na masha  marai 297 shanu nga ai hpyen yen dabang re hpe chye lu ai.

Leave a Reply

Your email address will not be published. Required fields are marked *