KIO uphkang ginra kata na Jawng Up ni a ningja jat wunkat hpawng galaw

KIO uphkang ginra kata na Dingdung Ginwang Ginjaw, Ginjaw Ginra Ginwang Ginjaw hte Laiza Muklum kata na Jawng Up ni a ningja jat wunkat hpe Laiza Lahta Tsang Jawng Rawt Ning Hkawng Gawknu kaw March 26 ya shani kaw nna sharin hpang nga sai hte April 5 ya shani du hkra sharin sa wa na re lam chye lu ai.

KIO Asuya Jawng ni hta Jawng Up galaw nga ai Jawng Up ni gaw laika sharin ai lam, hparan hpareng ai lam, jawng kata tatut bungli masing ni hpe hkrang woi shapraw ai lam ni hta awngdang na matu yaw shada ai lam Ginjaw Hapji Dap Ningtau Amu Madu Sara kaba Lahtaw Zau Hkyeng tsun dan ai.

Wunkat hta Ningtau Ninggawn Amu madu Salang Kakba Labang Doi Pyi Sa kawn Ninggawn Mung masa, Mai Ja Yang IED Jawng Up Sara kaba Nnye La Raw kawn Education Administration, Saranum kaba Saw Shwe Bu kawn Gender And Disability hte Positive Discipline ga baw ni hpe sharin ya nna rung hkridun, jahpan chyarang hte seng ai lam ni hpe woi hkaja, ningmu jawm shabung ai lam ni hpe galaw nga ai re.

Jawng up ni a ningja jat wunkat hpe Mai Ja Yang kaw mung Laiza kaw galo ai zawn aten langai, ga baw langai hte sha galaw nga ai re, Wunkat hta Dingdung Ginwang Ginjaw kata na jawng up marai (18), Ginjaw Ginra Ginwang Ginjaw kata na jawng up marai (21) hte Laiza Muklum kata na jawng up marai (4) yawng marai (43) tup sharin hkam la nga ai lam chye lu ai.

Leave a Reply

Your email address will not be published. Required fields are marked *