Nam San Yang mare kaw Junior ma ni a sharin hpawng lamang galaw

Nam San Yang mare kaw April (3) ya shani kaw nna Junior ma ni a sharin hpawng lamang hpe galaw hpang nga sai lam na chye lu ai.

Ndai Junior sharin hpawng hta Nam San Yang mare kaw nga nna ya aten Mai Na Camp, Ngwi Pyaw San Pya Camp, Zi Lun Camp, Jan Mai kawng Camp, Je Yang Camp, Hpunlum Yang Camp ni hta hpyen yen nga ai Ma ni hte Nam San Yang mare kaw bai wa sai Junior Ma ni marai (50) daram shanglawm sharin hkam la nga ai lam na chye lu ai.

Ndai sharin hpawng hta Kalay Center kaw na Sr/Srn ni, Wa Jau Doctor Gawlu Yung Wa hte Ma Ma ni, hpung Sr/srn ni sa du sharin ya ai rai nna sharin hpawng hta Jinghpaw Laika, Makam Masham hte seng ai lam ni, Hkamja lam hte htuk manu ai Ginsup hpan ni, Madum sumpyi (music) ni hpe sharin ya ai re lam Sara Fransic Gawlu Gam Awng tsun ai.

Junior sharin hpawng hpe shata mi sharin na rai n-htawm Ningbaw Ningla kaja ni paw pru wa na matu yaw shada nna ndai sharin dabang hpaw ai re lam Sara Fransic Gawlu Gam Awng tsun ai kaw na chye lu ai.

Nam San Yang mare gaw hpyen majan a majaw 2012 shaning kaw nna mare masha ni hpyen koi yen mat ai re hpe chye lu ai. Hpyen n yen shi ai ten N’ta htinggaw 600 jan nga ai rai nna ya a ten htinggaw 40 jan mare hta bai wa nga magang sai re hpe mung chye lu ai.

Leave a Reply

Your email address will not be published. Required fields are marked *