Laiza muklum kata myihprap wan sumri wan shadaw ni galai nga

Laiza Muklum kata Lai wa sai March shata kaw nna Wan sumri galai ai lam, Wan shadaw nnan jun ai lam ni galaw nga ai majaw shata 2/3 laman Wan jaw ai lam hta lawk hte lawk gali galai rai Wan jaw na re hpe Ginjaw Sut Masa Magam Dap Myi Hprap Wan gawn hkang rung kaw na chye lu ai.

Ya jai lang nga ai Wan sumri ni gaw lai wa sai 2005 ning kaw nna jai lang nga ai wan sumri ni rai nna Power hkrat ma sai majaw Muklum ting na wan sumri ni hpe Lanam garai ndu yang yawng galai ngut hkra galaw nga ai hta, Mung shawa ni chye na ya na matu Myi HPrap Wan Gawn Hkang Rung Lithkam Du Kaba Jum Gam Awng tsun ai hpe chye lu ai.

“Wan hpe aten hpring jaw lu na matu galaw nga ai hta Mung shawa ni nan mung Myi Hprap gawn hkang rung a tara hpe hkan sa ga, Ga shadawn myit hprap wan shalai ai hkan Yi Sun galaw sha ai Mung shawa ni Yi Sun kata Wan Sumri ni hpe hkra nna bungli galaw ra wa yang Wan Gawn Hkang Rung hpe shana ai lam galaw ga. Hka baw de nga ai Mung shawa ni mung Hka Pawt de wan jak nga ai hpe dum nna maza hpe Hka kaw kabai ai lam koi gam ga nga nna” Laiza Muklum hpe Myihprap wan jaw nga ai Munglai Hka Hpaga Zup  Wan Jak NingtauYu Reng Salang Gun La tsun shana ai re.

Ndai laman Wan sumri galai ai lam, Wan shadaw jun ai lam ni galaw wa ai hta tinang a nta shawng na hpun kawa ni hpe ra ai hta hkan nna jasan ai lam galaw wa yang, shawa a matu galaw ai re majaw Mungshawa ni hpe chye na shangun mayu ai lam Myi Hprap Wan Gawn Hkang Rung Lithkam tsun ai.

Ginhtawng aten du wa ai hte hka yawm wa ai majaw Muklum kata Myi Hprap Wan n-gun shawoi 1000 mi jan shapraw ya ai kaw na Ya 600 daram hte sha wan n-gun shapraw ya nga ai re hpe mung chye lu ai.

Leave a Reply

Your email address will not be published. Required fields are marked *