Nam San Yang mare kaw Myen Asuya hpaji jawng bai hpaw

Nam San Yang mare kaw 2019-2020 hpaji ladaw kaw nna Myen Asuya lapran tsang hpaji jawng bai hpaw na re majaw May shata praw kaw nna jawng ma hkap la nga sai lam na chye lu ai.

Nam San Yang mare kaw 2019-2020 hpaji ladaw hta Jawng Kaji kaw nna tsang (8) du hkra hpaw na re. Jawng ap ai shaloi Jawng htawt lekmat n ra ai, Gumhpraw n-hkrat ra ai, Kanu kawa mying, asak hte tsang sha ra ai lam Salang Hpaula Gam Hpang tsun ai.

Ndai hpaji jawng bai hpaw na matu Nam San Yang mare kaw du nga sai kanu kawa ni kawn tinang a kashu kasha ni hpaji lam hta hpang hkrat wa na tsang ai majaw Asuya de tang madu ai re. Asuya kawn mung hpaji jawng hta ra ai lam yawng hpe lit la ya ai re.

Hpaji jawng hpe hpyen n yen shi ai ten Dukaba Lazing Bawk gawgap da ai jawng kaw sha bai hpaw na re hte Nam San Yang mare kaw hpaji jawng bai hpaw na re majaw May 5 ya shani seng ang ai ni sa du jep chyoi ya sai re hpe mung chye lu ai.

Nam San Yang kaw du nga sai htinggaw (98) a kashu kasha ni yawng mung lung na re hte hpaji jawng hpe June 1 ya shani kaw nna hpaw na raitim Nam San Yang mare de ndu wa shi ai jawngma ni hte sumtsan hkan na jawngma ni yawng lu lung na matu  June shata mi tup mung jawng mying naw hkap la na re.

Jawng mying bang mayu ai rai yang Nam San Yang mare rung kaw mai sa bang ai rai nna May shata praw kaw nna Jawng ma matut manoi hkap la nga ai re hpe chye lu ai.

Leave a Reply

Your email address will not be published. Required fields are marked *