4th lang na Amyu Sha Hpaji Dakkasu (MIEd) a Jan Mau shagrau hpawng galaw

4th lang ngu na Amyu Sha Hpaji Dakkasu Jan Mau shagrau hpawng hpe May 17 ya shani Mai Ja Yang Manau wang Gawk Nu kaw jahpawt 10:00 am hta galaw ai lam chye lu ai.

Amyu Sha Hpaji Dakkasu (MIEd) hpe Wunpawng Mungdan Shang lawt Asuya, Ginjaw Hpaji Dap a masing kata hpaw sharin nga ai hta dai ni jawng yu ai marai 291 tup rai nna shagrau jaw ya ai Jan Mau ni gaw Diploma In Education, Diploma In TESOL (Teaching of English to Speakers of Other Languages), Pre-College Graduates ni re.

Laksan shagrau ai hta Academic of Excellent Award hpe Shayi Hkangda Seng Nan shagrau hkam la lu ai rai nna Diploma in Eduction Major hta na Academic Of Out Standing Award hpe Shayi Lahkang Jaw Htoi San, TESOL Mojar hta na Academic of Out Standing Award hpe Nhkum Nang Bawk, Pre College hta na Academic of Out standing Award lu ai ni gaw Nhkum Nang Mai, Lagwi Lu Di Bawm Wang, Dashi Hkawn Tsin hte Galau Ying Myaw ni rai nna Short Course (P.A.T) pang hta na Academic Of Out Standing Award lu ai ni gaw Tangbau Ze Nan, Lahpai Maria hte Nhkum Hkawn Ra ni shagrau hkam la lu ai re.

Janmau shagrau hkam la lu ai Jawngma ni hpe Wunpawng Mungdan Shanglawt Hpung Ginjaw Komiti Tingyeng Up Malai 2 Sara Kaba  Sumlut Gam kaw na Ngun jaw shatsam Mungga Shaga ai hta “amyu sha ni a hpaji lam hpe ndai daram hte sha myit dik ai lam n re ai sha grau madang dep hkra shakut ra ai” nga nna tsun shalawm ai re.

Wunpawng Mungdan shanglawt Asuya , Ginjaw Hpaji Dap gaw 1997 ning hta Mai Ja Yang kaw sara hpaji sharin jawng hpaw hpang nna Dai jawng hpe 2009 ning hta Sara Hpaji Hkawlik madang sharawt nhtawm, 2014 ning september shata hta Institute of Education madang de, Wunpawng Mungdan shanglawt lu wa hkra sharin achyin lam madun ya lu ai, atsam ningjahte hpring tsup ai sara kaja ni shalat na matu, Mungkan hte shingdaw nna woi awn lu ai hte hpaji hte makawp maga chye ai, tsawra shawang myit dam lada ai hpu-awn kaja ni hpe sharin shalat ya lu na matu, Wunpawng Amyu sha marai hkum shagu dinghkrai shanglawt lu ai ni byin tai wa lu na matu ngu ai yaw shada lam ni hte bai sharawt hpawt dat ai jawng rai nna dai ning 2019 ning hta gaw 4 lang ngu na janmau shagrau ai hpe galaw lu sai re lam chye lu ai.

Leave a Reply

Your email address will not be published. Required fields are marked *