16th lang na ASEAN Gawng magam shingjawng poi hta Wunpawng amyu sha marai 2 dazik hkamla lu

Myen Mung kawn madu tai nna Yangon MCC kaw galaw ai 16th lang na South East Asian Body Building and Physique Sports Championship 2019 hta Jinghpaw Mung, Waingmaw kaw na Salang Gadaw Zau Tawng kawn Gumhpraw dazik hte Salang Jawa Naw kawn Magri daik hpe hkam la lu ai lam na chye lu ai.

Ndai shingjawng lamang hta Myen Mung gawng malai hku nna Jinghpaw Mung kaw na Salang Gadaw Zau Tawng, Salang Jawa Naw, Shadang Htangde Brang Mai hte  Shayi Wut Yi Nin ni sa du shingjawng ai hta Salang Gadaw Zau Tawng gaw Kilo 70 kaw NO. 2 kumhpa, Gumhpraw dazik lu nna Salang Jawa Naw gaw sak kung gawng magam kaw NO.3 kumhpa, Magri dazik hkam la lu ai re lam Gumhpraw dazik hkamla lu ai Salang Gadaw Zau Tawng tsun ai.

“Wunpawng amyu sha kaw na Mungdan a gawng malai hku shanglawm shingjawng lu ai rai nna shingdu kaw na akyu hpyi garum ya ai ni, n-gun jaw nga ai ni yawng hpe chyeju dum ai hte Gawng Magam hta myit lawm ai ni yawng mung Mungkan madang du hkra lahkam ga, shakut ga ngu n-gun jaw mayu ai. Myit lawm ai ni hpe mung dangdi dang dep ai ram lam madun la na re” nga nna mung Salang Gadaw Zau Tawng matut tsun ai.

Ndai shingjawng poi gaw Sinpraw Dingda Asean kata na Mungdan 10 shanglawm let 3 ning hta kalang galaw ai rai nna dai ning gaw Myen Mung hku nna madu tai nna galaw ai re hpe mung chye lu ai.

Leave a Reply

Your email address will not be published. Required fields are marked *