Myen Hpyen Dap pat hkum ai majaw PPST bawngban hpawng nbyin mat

NCA kaw ta masat htu da ai laknak lang amyu sha rawt malang Hpung ni a PPST bungli masing bawngban hpawng hpe Thai Mungdan Chaingmai kaw galaw na matu hkyen lajang da ai raitim myen hpyen dap maga na ninghkap da ai majaw galaw na ahkang nlu mat ai lam NCA kaw ta masat ka da ai amyu sha laknak lang rawt malan Hpung a Salang ni tsun ai.

Office of The Military, Naval And Air Attaché rung na Brigadier General Khin Zaw kawn PPST a bungli masing bawngban hpawng hpe pat hkum ya na matu Thai Asuya hpe ninghkap laika ka hpyi shawn da ai re majaw PPST a bungli masing bawngban hpawng pat hkum katut ai re hpe chye lu ai.

Thai asuya kawn tsun da ai gaw PPST bungli masing bawngban hpawng hta NCA kaw ta masat nhtu da ai KIO hte KNPP Hpung ni lawm nga ai majaw Myen Asuya hte Myen Hpyen Dap kawn galaw nga ai simsa lam masing hpe dingbai dingna byin shangun wa mai ai. dai re ai majaw pat hkum ya na matu Myen Hpyen Dap kaw na hpyi shawn ai majaw pat hkum ai re lam tsun ai re hpe chye lu ai.

Ndai PPST a bawngban hpawng hta KIO hte KNPP Hpung ni n lawm ai lam, simsa lam bawngban hpawng grau masan sa na matu gaw NCA kaw ta masat htu da ai Hpung ni hte n htu da ai Hpung hkrum zup bawngban lu na matu Myen Asuya hte Myen Hpyen Dap kaw nna shara hkyen lajan ya ra ai lam KNU Ninggawn Amu madu Pado Saw Tar Do Moe RFA shiga dap hpe tsun da ai.

Myen Hpyen Dap maga de na gaw PPST bungli masing bawngban hpawng galaw na hpe pat hkum ya na matu Thai asuya hpe hpyi shawn da ai lam nnga ai nga nna, tsun ninghkap da ai lam nga ai re.

PPST bungli masing bawngban hpawng hpe June shata 8 ya shani hte 9 ya shani lahkawng ya galaw na matu hkyen lajang da ai raitim pat hkum  ai majaw masat da ai aten hta n galaw byin mat ai hte ndai hpawng hpe lawan ai hku bai bawngban lu na matu shakut galaw sa wa na re lam PPST Hpung malawm Amyu Sha Laknak lang rawt malang Hpung Ningbaw ni tsun da ai re hpe chye lu ai.

Leave a Reply

Your email address will not be published. Required fields are marked *