Hkawng Lang Hpu (ေခါင္လန္ဖူး) ginra hta Myen Mung Tsang 10 awng ai masha n nga

Putao Ginwang, Hkawng Lang Hpu (ေခါင္လန္ဖူး), Pan Nan Din Ginra ni hta 2018-2019 shaning hpaji ladaw hta Myen Mung Tsang 10 awng ai masha n nga ai lam na chye lu ai.

“Hkawng Lang Hpu (ေခါင္လန္ဖူး), Pan Nan Din Ginra hta Asuya lahta tsang Jawng 3 nga ai rai nna Jawngma ni gaw Nogmung myo de san poi sa htai ra ai re. Shaning shagu ngu na daram dai jawng kaw na Tsang 10 awng ai masha n nga ai re. Hkawng Lang Hpu ginra hta Jawng ma ni a hpaji lam grai naw ningra nga ai hte Jawng gawk kata jawng lang arung arai n hkum ai, Jawng Sara, Saranum ni n nga ai majaw Jawngma ni a hpaji lam grai hpang hkrat ai re” nga nan buga masha ni shana wa ai.

“Hkawng Lang Hpu (ေခါင္လန္ဖူး) ginra de du lu na matu hkrunlam mayak mung grai law ai rai nna dai ginra de hpaji sa sharin ya na Asuya magam gun ni mung kadai n kam sa ai, mare kaw Hka,Wan nlu ai manghkang ni nga ai. Dai ginra na Ma ni gaw tinang mare hta lai nna kaga de hkawm sa ai lam n nga ai majaw mahkrum madup n lu ai, malu masha hta hkan nna Ma ni a bawnu atsam mung nau ndep ai ndai lam ni gaw Asuya kawn atsawm n lu lit la ai majaw re ngu mu mada ai. Ndai zawn yak hkak ai ginra de hpaji sharin sa ni hpe gaw yak hkak ai shara de magam gun ai re majaw Asuya kawn mung Myo ga kaw magam gun ai ni hpe shata kumhpa jaw ai hta mung grau law jaw yang gaw kadai mung sa kam na re ngu mu mada ai” nga nna buga masha matut tsun dan ai.

Hkawng Lang Hpu (ေခါင္လန္ဖူး) ginra hta laning hte laning Tsang 10 awng masha n-nga ai majaw dai ning laman dai ginra hta jawng lung na jawng ma pyi n nga ai madang rai taw nga ai lam dai ginra na buga masha ni shana wa ai hpe chye lu ai.

Leave a Reply

Your email address will not be published. Required fields are marked *