Yuzana compny masha ni Mung shawa ni a lamu ga hpe n tara ai hku kashun wa

Yuzana company zing madu la kau ya ai lamu ga hte seng nna buga masha marai 4 a amu pyi n lu hpran shi ai aten company masha ni gaw Mung shawa ni galaw sha nga dingyang rai nga ai hkauna ni hpe 2019 May shata htum maga kaw nna kalang bai Jak kaba ni hte wa htu galau nna la ba zing madu wa nga ai lam buga masha ni shana wa ai.

“Yuzana company kawn Mung shawa lamu ga hpe lai wa sai 2006 shaning kaw nna zing madu la ai re hte zing madu la kau ai hpang 2, 3 ning ram sha galaw sha masu nna  kabai tawn da ai re hpe chye lu ai. Dai lamu ga kaw Mung shawa ni bai wa galaw sha ai hpe Yazana company kawn hkauna galaw sha ai ginra masha Salang Maran Seng Li, Salang Maran Brang Seng, Salang Wawhkyung Zau Tang hte Jan Hpau Ke Htang ni hpe Yuzana company a lamu ga woi gashun ai ningbaw re ngu nna Hpakant Tara Rung kaw amu hpaw da ai laning mi jan wa sai re. Dai lamu ga gaw amu n hpran ngut dingsa company maga kawn mung  hpa n mai galaw ai raitim n tara ai hku kalang bai jahkrit shama nna la ba ka-up wa ai re” nga nna buga masha langai tsun shana wa ai re.

Yunaza company na Manager re nga nna nga taw ai Aung Chit Oo ngu ai wa gaw dai lamu kaw n htu n ga hpye nna shani shana gawan hkawm nga ai re hte Mung shawa ni hpe jahkrit shama tsun shaga ai lam ni nga ai majaw ginra masha ni a hkawm sa hkawm wa lam pyi hkrit tsang ra ai madang de du nga ai. Company maga kawn grau shaja wa yang gaw ginra masha ni mung tinang lamu ga tinang bai lu hkra galaw sa wa na re lam ginra masha ni shana wa ai kaw na chye lu ai.

Leave a Reply

Your email address will not be published. Required fields are marked *