Hpun Lum Yang hpyen yen dabang kaw hpyen yen ladaw 8 ning hpring kyu hpyi hpawng galaw

Hpung Lum Yang hpyen yen dabang kaw hpyen koi yen ladaw 8 ning hpring akyu hpyi hpawng lamang hpe Jun 14 ya shani Dabang Hkalup Hpung nawku jawng kaw galaw ai re hpe chye lu ai.

Lai wa sai 2011 June 14 ya shani gaw Hpung Lum Yang dabang de hpyen koi yen Mung shawa ni nnan du shang hpang wa ai shani re majaw dai shani hpe masat nna shaning shagu dabang nawku hpung kaw na woi awn nhtawm akyu hpyi ai hpawng hpe galaw ai re lam Dabang Hpung Up Sara Wa Yan Jaw Gun tsun ai.

Hpyen koi yen ladu hkrum ai akyu hpyi hpawng sa ai Mung shawa ni gaw du na shaning kadai mung kadai a buga de wa lu nna buga de bai wa lu ai chyeju shakawn hpawng mahtang galaw lu na matu myit mada nga ai hte hpawng sa ai Hpt. Wahpai Gam mung dai zawn myit mada nga ai lam tsun ai.

Akyu hpyi hpawng hta hpyen yen ladaw 8 ning du hkra Karai Kasang bau sin makawp maga nga ai hpe chyeju shakawn ai hte garum madi shadaw nga ai wuhpung wuhpawng ni, Myu sha lam yan hta apnawng dawjau nga ai ni, hpyen koi yen nga ai Mung shawa ni sari sadang hpring hpring shimlum ai hte tinang a buga ginra de bai wa lu na matu Myu sha ni hpe lam woi ningshawng tai nga ai Wunpawng Mungdan Shanglawt Asuya a matu hte woi awn nga ai Ningbaw Ningla ni a matu akyuhpyi hpyi n-gun la ai re hpe chye lu ai.

Leave a Reply

Your email address will not be published. Required fields are marked *