Laiza muklum kata gat seng hkan na zingla lu ai aten lai lu sha, hkumpat lu sha ni hpe wan nat jahten

Laksan Laiza muklum Pati Komiti kawn woi awn ai n pu, Hkamja Dap hte kaga Magam Dap, Makan Dap ni pawnghpawm nhtawm Muklum kata gat seng ni hkan na jep joi zing la lu ai aten lai lu sha, hkum pat lu sha ni hpe June 15 ya jahpawt Laiza muklum maza kabai jasan shara kaw wan nat jahten ai lam galaw ai hpe chye lu ai.

“Laiza muklum kata Mung shawa ni a hkam ja lam hte seng nna muklum kata nga gat seng ni hkan aten lai lu sha hte hkum pat lu sha ni  hpe hkan zing ai lam hpe laning mi hta 2 lang daram galaw ai re. Ndai hku galaw ai marang e muklum kata na Mung shawa ni mung gara gaw pat hkum lu sha aten lai lu sha ngu  ai hpe chye ginghka let sadi sahka chye maram wa ai” nga nna Laksan Laiza Muklum Hkamja Du Kachyi Htu Sin Wa Naw tsun ai.

“Mung shawa hkamja lam hte seng nna Laksan Laiza Muklum Pati Komiti hte Hkamja Dap ni kawn shaning shagu woi awn galaw ai hta Mung shawa ni hku nna mung lit nga ai ni shaning shagu galaw nga ai magam bungli re ngu ai hku mu mada ai nre sha Mung shawa hkam kaja lam a matu galaw ai re ngu mu mada let atsawm hkan sa yang Mung shawa hkam kaja lam hpe madi shadaw lu na re” nga nna Hkamja DU matut tsun ai.

May shata praw laman zing la lu ai aten lai lu sha hte hkum pat lu sha ni gaw Miwa gumhpraw Yuan hkying kru jan hte Myen gumhpraw hku nga yang Ks. Sen 8 daram manu nga ai rai nna ndai lu sha ni hpe May shata praw laman hta zing la lu ai arai ni re hpe chye lu ai.

Leave a Reply

Your email address will not be published. Required fields are marked *